Монгол Улсын Ерөнхийлөгч Ц.Элбэгдорж, Баянхонгор, Завхан, Говь-Алтай, Ховд, Увс аймгуудад ажилласныхаа дараа Хөвсгөл аймагт очлоо.
Тус аймагт 154 мянган мал хорогдсон, 6 сум гамшгийн байдалтай, 4 сум зудтай байна. Аймгийн төв Мөрөн суманд дулааны асуудал хүнд байна. “Хөлдөлтийн байдалтай байна. Бид замын сан, хөрөнгө оруулалтын сангуудад байгаа бүх хөрөнгө мөнгөөрөө нүүрс авахад зориулж байна” гэж аймгийн засаг дарга Л.Цэрэнжав ярилаа. Хөвсгөл нутагт үйл ажиллагаа явуулж байгаа аж ахуйн нэгжүүдийн татварыг орон нутгийн төсөвт төвлөрүүлэх, Ханхын хилийн боомтоор мал, махан бүтээгдэхүүн экспортлох зэрэг аргаар аймгийн эдийн засгийг чадавхжуулахад дэмжлэг үзүүлэх хүсэлтэй байгаагаа танилцуулав.
Өнгөрсөн жил шатсан Жаргалант сумын сургуулийн байрыг шинээр барих 400 сая төгрөгийг яаралтай шийдвэрүүлэхийг хүсч байгаагаа мөн хэллээ.
Орон нутгийн эрх мэдлийг өргөтгөж, нутгийн удирдлагад төсвийн эрх мэдэл өгөх тухай асуудал энэ аймагт мөн хөндөгдөж байв.
Ерөнхийлөгч Мөрөн сумын төрийн байгууллагын удирдлагуудтай уулзаж, баримталж ажиллаж байгаа бодлого, хэрэгжүүлж буй үйл ажиллагааныхаа талаар танилцуулж, иргэдийн асуултанд товч хариулсны дараа Хөвсгөл аймгийн Тариалан сумыг зорив.
Тариалан сумын иргэд, орон нутгийн удирдлага ямар ч эрх мэдэлгүй, төвлөрөл хэтэдсэнийг шүүмжилж байлаа. Ерөнхийлөгчийн санаачлагаар байгуулагдсан Иргэний танхимтай ижил бүтэцтэй танхимыг орон нутагт байгуулахад дэмжлэг үзүүлэх талаар Ерөнхийлөгчөөс хүсч байсан.
Ерөнхийлөгч “Орон нутгийн эрх мэдлийг өргөтгөх талаар эрс өөрчлөлт хийх цаг нь болсон. Олон жил аймаг сумын удирдлага төсвийн ямар ч эрх мэдэлгүй, банкны касс шиг үүрэгтэй ажиллаж ирлээ. Зуд турхан болоход өвс тэжээл, бензин тосондоо зарцуулах хөрөнгө мөнгөний мэдэлгүй , хэзээ тусламж ирэх бол гэдгийг хараад гар мухар сууж байна. Орон нутагт баялаг бүтээсэн бол тэр баялаг орон нутагтаа зарцуулагдах ёстой. Төвлөрөл хэт ихэдсэн энэ байдлыг арилгахын төлөө санаачлагатай ажиллах болно” гэв.
Төрийн албан хаагчид хүнд сурталтай, иргэдийн төлөө ажилладаггүй , төрийн албыг хувийн компани шиг ах дүү , үр хүүхдэдээ өвлүүлэн дамжуулдаг болсон тухай ард түмэн шүүмжиллээ. Төрийн албаны хуулинд өөрчлөлт оруулж өгөхийг тэд хүсч байлаа.
Шүүгчид иргэний төлөө ажилладаггүй, зөвхөн тэднийг шийтгэхийн төлөө ажилладаг, мөнгөтэй эрх мэдэлтэй хүмүүс ял сонсдоггүй шударга бус байдлын талаар иргэд баримттай нотолгоотой олон зүйлийг хэлж байсан нь Тариалан суманд ч мөн давтагдлаа.
Ерөнхийлөгч Ц.Элбэгдорж, Хөвсгөл аймгийн Тариалан суманд ажилласны дараа Орхон аймгийн зорилоо.
