2010 оны 3 дугаар сарын 25-нд “Эрүүгийн хуульд нэмэлт, өөрчлөлт оруулах тухай” хуулийн төслийг "Иргэний танхим"-аар хэлэлцэв.
2005 оны 10 дугаар сарын 5-ны өдрийн хуулиар соёрхон баталсан “Авилгалын эсрэг Нэгдсэн Үндэстний Байгууллагын конвенц”-д Монгол Улсын “Эрүүгийн хууль”-ийг нийцүүлэх, авлигын гэмт хэргээс урьдчилан сэргийлэх, таслан зогсоох, энэ төрлийн гэмт хэрэгтэй хийх тэмцлийг эрчимжүүлэх зорилгоор Монгол Улсын Ерөнхийлөгчөөс санаачилж, боловсруулсан Эрүүгийн хуульд нэмэлт, өөрчлөлт оруулах тухай хуулийн төслийг "Иргэний танхим"-аар хэлэлцлээ.
Хэлэлцүүлэг 6 цаг үргэлжилж, 78 иргэн оролцов. Үг хэлсэн хүмүүс Төслийг ерөнхийд нь дэмжиж, энэ хууль авлигатай тэмцэх ажилд чухал хувь нэмэр болно гэж үзэж буйгаа илэрхийлж, "Иргэний танхим"-ын хэлэлцүүлгээр дамжуулан хуулийн төсөлд, иргэн хүний хувиар саналаа өгөх боломжтой болж байгаадаа талархаж байв.
Хэлэлцүүлэгт оролцсон Азийн сангийн ажилтан Б.Даваасүрэн “хууль бусаар хөрөнгөжих үйлдлийг гэмт хэрэгт тооцохоор төсөлд тусгасан нь зөв, харин энэ зүйлд хамаарах хүмүүсийн хүрээг нэмэгдүүлж, хамаатан төрөл саданг оруулах нь зүйтэй” гэсэн санал хэлэв. Авлигын гэмт хэрэг үйлдсэн хүмүүсийг өршөөлд хамааруулахгүй талаарх төслийн саналын хувьд оролцогсодын зарим нь дэмжиж, харин зарим нь эсрэг саналтай байв. МУИС-ийн Хууль зүйн сургуулийн багш Ж.Эрдэнэбулган, Өмгөөлөгч Д.Пүрэвбаатар “авлига, хээл хахууль гэдэг ойлголтыг тусад нь томъёолох, эрүүгийн хуулийн ерөнхий ангийн зохих зүйлийг өөрчлөх” саналыг гаргаж байсан бол иргэн С.Чулуунбаатар Эрүүгийн хуульд нэмэлт, өөрчлөлт оруулахаас илүү Эрүүгийн хуулийг бүхэлд нь авч үзэх ёстой гээд бусад хуультай хамт авч үзэж, гэмт хэргийн улмаас учирсан хохирлыг нөхөн төлөх асуудалд анхаарал хандуулахыг хүсэв.
Ийнхүү Монгол Улсын Ерөнхийлөгчийн дэргэдэх "Иргэний танхим"-ын ээлжит хэлэлцүүлэг “Эрүүгийн хуульд нэмэлт, өөрчлөлт оруулах тухай” хуулийн төслөөр амжилттай явагдаж өнгөрлөө.
Та доорх энэхүү холбоос дээр дарж нээлттэй хэлэлцүүлэгт ирсэн саналуудыг үзнэ үү?
"Иргэний танхим"-ын ажлын алба
