Монгол Улсын Ерөнхийлөгч Цахиагийн Элбэгдоржийн төрийн айлчлал БНХАУ-ын Засаг захиргааны онцгой бүс Хонконгт үргэлжилж байна. Ерөнхийлөгч айлчлалынхаа хүрээнд энэ сарын 28-нд зохион байгуулагдсан Монгол, Хонконгийн бизнес форумд оролцлоо.
Монголын ажил олгогч эздийн нэгдсэн холбоо, Mongolia Club болон Skypath Partners зэрэг байгууллагуудын хамтран зохион байгуулсан арга хэмжээг нээж, Mongolia Club-ийн нарийн бичгийн дарга Виктор Янг үг хэллээ. Дараа нь Монгол Улсын Ерөнхийлөгч хэлсэн үгэндээ “Бизнес эрхэлдэг хүн бүр ажил хэрэгч, бодит байдлыг эрхэмлэдэг. Тиймээс би бодитой зүйлээс яриагаа эхэлье. Яагаад Монголд бизнес эрхлэхэд тохиромжтой вэ? Монгол бол нээлттэй улс. Бүх зүйл олон нийтэд нээлттэй. Бид сүүдрээ хэнээс ч нуудаггүй. Хэвлэл мэдээлэл эрх чөлөөтэй, ард иргэд төр засгаа чөлөөтэй шүүмжилдэг. Энэ бүхнээс бид суралцаж, цаашид хөгжихийн төлөө зүтгэж явна.
Бусдын нэгэн адил бид алдаа гаргадаг. Заримдаа хөрөнгө оруулагчдынхаа урмыг хугалах тохиолдол ч гарна. Гэвч бид нээлттэй учраас алдаагаа залруулж чадна. Сар орчмын өмнө би БНАСАУ-д айлчилсан. Үүний дараа Мьянмар, Вьетнам, Сингапурт төрийн айлчлал хийлээ. Зарим улсад иргэн нь алдаа гаргавал өөрийн бизнес, бүр амь насаа алдах аюултай байх юм. Гэтэл Монголд аливаа хүн алдаа гаргавал зөвхөн сургамж болоод үлддэг. Энэ бол бидний давуу тал.
Монголд асар их боломж бий. Бурхнаас бидэнд газарзүйн ашигтай байршил заяажээ. Хоёр гүрэн, хоёр том зах зээлийн дунд бид оршдог. Хэдэн сарын өмнө би БНХАУ-ын Ерөнхийлөгч Си Жиньпинтэй уулзаж, халуун дотно, илэн далангүй яриа өрнүүлсэн. Өнгөрсөн 2012 болоод 2013 онд монголчууд багагүй сорилт бэрхшээлтэй тулгарлаа. БНХАУ-ын эрэлт буурч, уул уурхайн түүхий эдийн үнэ унасан. Мөн өмнөд хөрш болон манай улсад сонгууль болж, төр засгийн удирдлага солигдсон. Харин өнөөдөр бүх зүйл жигдэрч, урт хугацааны хамтын ажиллагаагаа эхлүүлэх цаг иржээ. Өмнөд хөршийн маань түншүүд бидэнтэй урт хугацаанд хамтран ажиллах хүсэлтэй буйгаа илэрхийлсэн. Манай хоёр орны хооронд “win win” буюу харилцан ашигтай хамтран ажиллах эрмэлзэл бий. Үүний дагуу хамтдаа хийж бүтээн, хамтдаа хөгжицгөөе.
Монгол уул уурхайн баялгаараа дэлхийн топ аравт багтдаг. Гэвч энэ их баялгийг ашиглахын тулд хөрөнгө оруулалт хэрэгтэй. Бид сүүлийн хэдэн жилд чамгүй туршлага хуримтлуулж, боловсон хүчнээ сайтар бэлдлээ. Гадаадын хөрөнгө оруулалтыг татахын тулд бид энэ бүхнийг хийх ёстой гэдгийг манай иргэд ойлгосон.
Монголын эдийн засаг 2011 онд үсрэнгүй дээшилж, хурдаараа дэлхийд тэргүүлсэн. Энэ өсөлтийг цаашид хадгалж үлдэхийн тулд манай төв банк, Засгийн газар чармайн ажиллаж байна. Манай Засгийн газар уян хатан, аливаа зүйлийг хүлээн авч хариу өгөхдөө шаргуу. Манай парламент саяхан хөрөнгө оруулалт, аюулгүй байдал, Хөрөнгө оруулалтын сангийн тухай шинэ хуулийг баталсан. Хөрөнгө оруулагчдын хувьд хуулийн тогтвортой байдал чухал. Иймээс парламентын нийт 76 гишүүний гуравны хоёроос дээш хувийн саналаар дээрх хуульд өөрчлөлт хийхээр заасан. ТиймээсХхөрөнгө оруулалтын хууль тогтвортой мөрдөгдөх биз ээ.
Монголын хөрөнгө оруулалтын орчин цаашид дордохгүй улам сайжирна гэж үзэж байна. Сүүлийн жилүүдэд би хууль, шүүхийн шинэтгэлийн ажилд гол анхаарлаа хандуулж ирлээ. Уул уурхайн баялгаас ашиг орж ирээд байхад хууль, шүүхийн тогтолцоо асуудалтай байж болохгүй. Ярих хийхээс амархан. Аливаа шинэчлэлийг хийхийн тулд эхлээд иргэдийнхээ сэтгэлгээг өөрчлөх хэрэгтэй. Манай хууль, шүүхийн тогтолцоо хөрөнгө оруулагч, ард иргэдийн бус эрх мэдэлтэй нэгний ашиг сонирхлын төлөө үйлчилдэг байсан. Үүнийг өөрчлөхийн тулд бид олон зүйлийг хийж, олон хууль батлууллаа.
Монгол Улс 2012 онд авлигыг хамгийн хурдацтай бууруулсан улсаар шалгарсан. Бид зөвхөн нэг жилийн хугацаанд 26 шат ахисан. Энэ амжилтаа ахиулахын төлөө бид зүтгэнэ. Бид “Том төрөөс ухаалаг төр лүү” хэмээх санаачилгыг эхлүүлээд удаагүй байна. Энэхүү санаачилгыг ард иргэд идэвхтэй дэмжиж байгаа. Үүний дагуу шинэ хууль журмуудыг парламентаар батлуулна гэж бодож байна. Төр засгийн эрх мэдэл, оролцоо хувийн бизнесийн салбарт хэтэрхий хүч түрэн орсон байгаа. Энэ бүхнийг бид зогсооно.
Бид Сингапурын Temasek-ийн нэгэн адил бүтэц, зохион байгуулалттай компанийг байгуулахаар судалж байгаа. Уул уурхай, барилга зэргийн зөвшөөрлийг төрийн байгууллагаас өгдөг байдлыг бид зогсооно.
Хонконг Монголын хооронд шууд нислэгтэй байгаад би баяртай байна. Монголд очиж үзсэн нь дахиж ирээрэй. Очиж үзээгүй нь ирж бизнесээ шинээр эхлүүлэх, хамтран ажиллах боломжоо нээгээрэй гэж хүсье” хэмээв.
Дараа нь Монгол Улсын сайд, ЗГХЭГ-ын дарга Ч.Сайханбилэг Монголын эдийн засаг, хөрөнгө оруулалтын шинэ орчны талаар, Монгол банкны Ерөнхийлөгч Н.Золжаргал Монголын банк, санхүүгийн салбарын өнөөгийн нөхцөл байдлын талаар тус тус илтгэл тавилаа. Мөн Барилга, хот байгуулалтын сайд Ц.Баярсайхан 100 мянган айлын орон сууц төслийн талаар, Үйлдвэр, хөдөө аж ахуйн дэд сайд Ц.Туваан Сайншанд аж үйлдвэрийн болон технологийн паркийн талаар тус тус илтгэлээ хүргэв.