“Төсвийн байгууллагын удирдлага, санхүүжилтын тухай” хууль, “Нэгдсэн төсвийн тухай” хуулийг нэгтгэн өнөөгийн тавигдаж байгаа нөхцөл байдалд зохицуулан Сангийн яамнаас боловсруулсан “Төсвийн тухай” Монгол Улсын хуулийн төслийн хоёрдох хэлэлцүүлэг Ерөнхийлөгчийн дэргэдэх “Иргэний танхим”-д өнөөдөр болж өнгөрлөө.
Өнөөдрийн хэлэлцүүлгээр иргэд, олон нийтийг төсөв зохиох болон батлах, гүйцэтгэх, хянах бүхий л шатанд оролцох, орон нутагт төсвийн эрх мэдлийг олгох, төв орон нутгийн татаас шилжүүлгийн асуудал зэрэг орон нутгийн төсвийн харилцааны шинэчлэлтэй холбоотой бүхий л асуудлаар ярилцав.
Тус хэлэлцүүлэгт УИХ-ын зарим гишүүд, холбогдох албаны хүмүүс, их дээд сургуулиудын баг нар, орон нутгийн төсвийн харилцаа, бүс нутгийн чиглэлээр судалгаа шинжилгээ хийдэг эрдэмтэн судлаачид, иргэдийн төлөөлөл зэрэг өргөн хүрээнд хэлэлцүүлэг боллоо.
Уг хуулийн төслөөр шийдвэрлэгдэх асуудлууд нь:
- Орон нутгийн өөрөө удирдах ёсны зарчмыг төвлөрсөн байдлаар зохицуулж санхүүжилтийг хэт багасгасан нь орон нутгийн бие даасан байдал, бүс нутгийн хөгжил, орон нутгийн удирдлагын хариуцлагыг сулруулж, төрийн үйлчилгээ болон төсөвт тавих иргэдийн хяналтыг бууруулж байгааг зохистой зохицуулах,
- Орон нутаг болон төвлөрсөн төсвийн одоогийн харилцаа нь эдийн засгийн шилжилтийн эхэн үед төсвийн зохицуулалтыг нэгдсэн удирдлагаар хангах зайлшгүй шаардлага, ойрын жилүүдэд ч энэ зарчмыг хадгалах нь үр дүнтэй байж болох ч улсын төсвөөс орон нутгийн төсөвт олгох шилжүүлэг болон орон нутгийн төсөвт орох татварын уян хатан оновчтой зохицуулалт хийх зэрэг шинэлэг зохицуулалтуудыг агуулжээ.
