Ташкент хотноо болсон ШХАБ-ын дээд хэмжээний уулзалт дээр Монгол Улсын Ерөнхийлөгч Ц.Элбэгдоржийн хэлсэн үг
Ташкент хот, 2010 оны 6 дугаар сарын 11
Эрхэмсэг ноён Ерөнхийлөгч Каримов,
Төлөөлөгчдийн тэргүүн нар аа,
Хатагтай, ноёд оо,
Юуны өмнө Монголын төлөөлөгчдийг Шанхайн хамтын ажиллагааны байгууллагын энэхүү ээлжит дээд хэмжээний уулзалтад урьж, халуун дотноор хүлээн авч буйд Эрхэмсэг ноён Ерөнхийлөгч Ислам Абдуганиевич Танд гүн талархлаа илэрхийлье. Дээд хэмжээний уулзалтад оролцож байгаа улс орнуудын нийт төлөөлөгчдөд чин сэтгэлийн мэндчилгээ дэвшүүлье.
Эрхэм хүндэт Дарга аа,
Эдүгээ олон улсын хамтын нийгэмлэг хүн төрөлхтний өмнө тулгарсан олон асуудал, тухайлбал, санхүү-эдийн засгийн хямралыг даван туулах, тогтвортой хөгжил, аюулгүй байдлаа хангах, байгаль орчноо аврах, олон улсын терроризм, зохион байгуулалттай гэмт хэрэг, хар тамхины наймаа, халдварт өвчинтэй тэмцэх хэрэгт хүч чармайлтаа нэгтгэж байгаа билээ.
Бүс нутгийн хэмжээнд эдгээр чиглэлээр хамтран ажиллах үр нөлөөтэй механизм болон төлөвшиж байгаа ШХАБ-ын үйл ажиллагааг Монгол Улс өндөр үнэлж байдаг юм. Монгол Улс 2004 оноос тус байгууллагын ажиглагч орон болсон. Өнөөдөр тус байгууллага ажиглагч орнуудаас гадна яриа хэлэлцээний түнш орнуудтай болсон байна. 2004 онд ШХАБ-аас Ази-Номхон далайн бүс нутгийн байгууллагуудын хооронд түншлэлийн харилцааны сүлжээ бий болгох тухай санаачилга гаргаж байсан билээ. Дэлхий даяршиж байгаа өнөөгийн нөхцөлд бүс нутаг, салбар бүсүүдийн байгууллагуудын хоорондын харилцаа холбоог ойртуулах нь цаг үеийн шаардлага гэж үзэж байна.
Манай Улс бүс нутгийн улс төр, эдийн засгийн хамтын үйл явцад оновчтой оролцох бодлогынхоо хүрээнд ШХАБ-ыг Төв Азийн бүс нутгийн олон талт хамтын ажиллагаанд оролцох нэг чухал суваг гэж үздэг юм. ШХАБ-аас ажиглагч улсууд хийгээд хил залгаа улс орнуудыг ШХАБ-ын эдийн засгийн чиглэлийн үйл ажиллагаанд татан оролцуулах нь бүс нутгийн эдийн засгийн хамтын ажиллагааг бэхжүүлэх, эдийн засаг, худалдаа, хөрөнгө оруулалт, зам тээвэр, хөдөө аж ахуй зэрэг салбарт эрх тэгш, харилцан ашигтай харилцааг хөгжүүлэх таатай нөхцөл бүрдүүлэхэд дэм болно хэмээн үзэж байгааг ажиглагч орны хувьд талархан тэмдэглэж байна. Ялангуяа, эрчим хүч, зам тээвэр, тэргүүний технологийн салбарт “үлгэр жишээ” төслүүдийг хэрэгжүүлэх үзэл санаа бидний анхаарлыг татаж байгааг энд онцлохыг хүсч байна.
ШХАБ манай саналыг хүлээн авч Ажил хэргийн зөвлөлийнхөө ээлжит хуралдаанаа анх удаа ажиглагч оронд, Улаанбаатар хотноо энэ оны эхэнд зохион байгуулсаныг тэмдэглэхэд таатай байна. Зөвлөлгөөнд оролцогчид манай бизнесийн орчин, боломж нөхцөлтэй танилцаж ойлголт авсан гэдэгт итгэж байна.
Хатагтай, ноёд оо,
Олон улсын терроризм, хэт даврах үзэл, хар тамхины хууль бус наймаа зэрэг уламжлалт бус аюул заналхийлэл бүс нутгийн хөгжил цэцэглэл, тогтвортой байдалд сөргөөр нөлөөлсөөр байна. Эдгээр аюул заналыг бүрэн арилгахад ард түмнүүдийн харилцан итгэлцэл, ойлголцлыг гүнзгийрүүлэх, соёл иргэншил хоорондын яриа хэлцээг өргөжүүлэх, эдийн засгийн хоцрогдол, ядуурлыг даван туулах зайлшгүй шаардлагатай. Энэ ч үүднээс сүүлийн жилүүдэд ШХАБ-ын зүгээс эдийн засаг, худалдаа, соёл, хүмүүнлэгийн хамтын ажиллагааг өргөжүүлэн хөгжүүлэхэд ихээхэн анхаарал тавьж байгааг бид өндрөөр үнэлж байна.
ШХАБ нь өргөн утгаараа Евроазийн бүс нутагт олон талт хамтын ажиллагаа хөгжүүлэх чухал гүүр болно гэж бид үздэг. Тус байгууллагын гишүүн болон ажиглагч орнууд нь манай улсын гадаад бодлого, гадаад эдийн засаг, худалдааны харилцаанд онцгой байр суурь эзэлдэг түнш орнууд юм. Энэ нь манай улс болон эдгээр орны хооронд хоёр болон олон талын үндсэн дээр өргөн хүрээтэй хамтын ажиллагаа хөгжүүлэх боломжийг нээж байгаа. Чухам үүнээс үүдэн Монгол Улс тус байгууллагын үйл ажиллагаанд оролцоогоо өргөжүүлэхийг эрмэлзэж байна.
Бүс нутгийн энх тайван, аюулгүй байдал, улс орнуудын хөгжил дэвшил, ард түмнүүдийн сайн сайхны төлөө ШХАБ, түүний гишүүн болон ажиглагч орнуудтай Монгол Улс цаашид ч идэвхтэй хамтран ажиллах болно.
Анхаарал тавьсанд баярлалаа.
Ташкент хотноо болсон ШХАБ-ын дээд хэмжээний уулзалт дээр Монгол Улсын Ерөнхийлөгч Ц.Элбэгдоржийн хэлсэн үг
