Монгол Улсын Ерөнхийлөгч Цахиагийн Элбэгдорж өнөөдөр Мьянмарын төрийн албан хаагч, багш, оюутнуудтай уулзалт хийв. Мьянмарын нийслэл Нэйпидо хотын Олон улсын хуралдааны төвийн танхимд болсон уулзалтад нийт 2000 орчин хүн цугларсан байлаа.
Уулзалтын эхэнд Ерөнхийлөгч Монголын өнөөгийн нийгэм, эдийн засаг, улс төрийн байдлын талаар танилцуулав. Нэгэн цагт монголчууд дэлхийн хамгийн их газар нутгийг эзэлсэн хүчирхэг гүрэн байгуулан хэдэн зууны турш ноёрхлоо тогтоож байсан тухай ярилаа. Дал гаруй жилийн турш коммунист дэглэмтэй байгаад 1990-ээд оноос ардчилал, чөлөөт зах зээлийн тогтолцоонд шилжсэн. Дэлхийн олон оронд тогтолцоо солигдоход нийгэм үймээн самуунд нэрвэгдсэн бол монголчууд нэг ч цонх хагалалгүй ардчилсан хувьсгалыг улс төр, эдийн засаг, нийгмийн салбарт зэрэг хийсэн.
Ерөнхийлөгч Ц.Элбэгдорж малчны гэр бүлд төрж өсөн ардчилсан хөдөлгөөнийг тэргүүлэх хүртэл намтраа товч дурдав. Монголын ардчилсан хөдөлгөөний талаар өгүүлэхдээ тэрбээр иргэдийн оролцоо хамгийн чухал байсныг онцоллоо. Иргэдийн оролцоог дэмжихийн тулд тэрбээр Монгол Улсын Ерөнхийлөгчөөр анх сонгогдохдоо өөрийн өрөөг Иргэний танхим болгон иргэдийн саналыг чөлөөтэй сонсоход зориулсан. Улс орны чухал шийдвэрийг гаргахдаа иргэдийг өргөнөөр оролцуулж, төсөв мөнгө, эрх мэдлийг нь олгож өгвөл үр дүнтэй хэрэгждэг. Монголын хөгжил сум дүүрэг аймгийн хөгжлөөс эхэлдэг учир энд анхаарлаа хандуулан ажилласан тухай ярив.
Цааш нь Шилэн дансны тухай хууль монголчуудын дэмжлэгийг хамгийн ихээр авч, өнөөдөр үр дүнтэй хэрэгжиж буйг дурдав. Өнөө цагт аливаа улс оронд аюул занал гаднаас биш дотроос учирдаг, авлигалтай тэмцэж, сайн засаглал цогцлоож чадахгүй бол улс оронд аюул нүүрлэдэг. Үүний төлөө Ерөнхийлөгч Ц.Элбэгдорж анх Ерөнхий сайдаар сонгогдон ажилласнаас хойш идэвхитэй ажиллан, саад бэрхшээлтэй олонтаа тулгарч байсан. Авлигын эсрэг хуулийг санаачлан, хуулийн шинэчлэлийг эхлүүлэх гэх мэт олон ажил хийсэн. Улс оронд нийгэм, эдийн засгийн шинэчлэл явуулахад хялбар, харин иргэдийн сэтгэл санааг өөрчлөхөд бэрх, хэдэн зуун, хүний амьдралын хэдэн үе шаардагдана.
Ардчиллын үнэт зүйлийг асран хамгаалах нь нэг далайлтаар биш үргэлжийн мөнхөд хийх ажил. Хэрэв иргэдэд эрх чөлөө байвал амархан сурдаг, их зүйлийг хийж бүтээж чаддаг. Социалист нийгэмд хүний алдааг уучилдаггүй бол ардчилсан нийгэмд хүн алдаан дээрээ суралцаж урагшилдаг.
Монголын төрийн үйлчилгээг хялбаршуулан иргэдэд ямар ойр болсон тухай, хүнд суртлыг багасгах тал дээр олон ажил хийснийг танилцуулав. Өмнө нь Монголд хүнд суртал дээд цэгтээ тулж, төрийн үйлчилгээг авлигал хээл хахууль, танил талаараа дамжуулан авдаг байсан бол өнөөдөр маш хялбар бөгөөд хурдан болсон. Өмнө нь Монголд газрын наймаа цэцэглэн нэг ёсны бизнес болон хувирсан байсан бол өнөөдөр байдал эрс сайжирсан. Хашаа байшинд амьдардаг иргэд газраа заран орон сууцанд олноороо орж байгаа.
Ардчилал гэдэг нь хүн бүрийг аз жаргалтай амьдруулна гэсэн үг биш. Хүн бүхнийг сайхан амьдруулна гэж бид амлаагүй. Харин хүн бүрт үзэл бодлоо чөлөөтэй илэрхийлэх, шүүмжлэх гэх мэт эрхүүдийг нь олгоно гэж бид амласан. Тиймээс Монголд хэвлэлийн эрх чөлөөг хязгаарлах ямар ч хууль журам байхгүй, олон нийтийн сүлжээнд иргэд үзэл бодлоо ямар ч цензургүй илэрхийлдэг.
Монголд өнөөдөр тулгамдаж буй том бэрхшээлүүдийн нэг бол хариуцлагын асуудал. Төрийн өндөр албан тушаалд хүрсэн хүн алдаа гаргавал албан тушаалаараа бамбай хийн хариуцлагаас зугтах тохиолдол олонтаа гарч байгаа учраас Монгол Улсын Ерөнхийлөгч Сонгогдсон болоод томилогдсон албан тушаалтнуудад хариуцлага хүлээлгэх тухай хуулийг санаачилсан.
Монголд төрийн ой санамжийн тогтолцоо алдагдсан, сонгуулиар ялсан нам өөрийн гишүүдээ төрийн байгууллагуудад ажилд оруулан, хуучин ажилтнуудыг халдаг байдлыг халахын төлөө ажиллаж байгаа.
Тэгэхээр бид энэ бүх муу зүйлийг өөрчлөх хэрэгтэй. Бид өөрчлөлт хийх ёстой гэдгийг алдаа дутагдлаасаа сургамж авч мэдэж байна. Хийсэн алдаа дутагдлынхаа бурууг мэдэж, өөрчлөх ёстой юм гэдгийг мэдэхийн тулд нийгэм нээлттэй, иргэдийнхээ нүдийг нээлттэй байлгах ёстой хэмээв. Хэрэв нийгэм нээлттэй бол өөрчлөлт хийхийг шаардана.
Ардчилал гэдэг нь өөртөө итгэхийн нэр. Мьянмарын иргэдээс илүү Мьянмарын амьдралыг дээшлүүлэх хүн байхгүй.
Мөн Ерөнхийлөгч цааш нь хэлэхдээ аливаа улс орны төр засаг аль болох том, хүнд сурталтай байх хандлагатай байдаг. Энэ тал дээр Ерөнхийлөгч Ц.Элбэгдорж “Том төрөөс ухаалаг төр рүү” санаачилгыг дэвшүүлсэн.
Монгол нь байгалийн баялгаар дэлхийн шилдэг аравт багтдаг, эдийн засгийн өсөлтөөр дэлхийд тэргүүлж байсан удаатай. Ашиг орлого ихтэй байсан үедээ иргэдэд мөнгө тарааж үрэлгэн хандсан, хуримтлал бүрдүүлээгүйн улмаас монголчууд алдсан. Энэ чиглэлээр Норвеги болон бусад улс орны туршлагыг судалж, цаашид ийм алдаа гаргахгүйн төлөө ажиллаж байна. Уул уурхайн бүтээгдэхүүн бусад түүхий эдээ боловсруулан нэмүү өртөг шингэж гадаадад экспортлохын чухлыг онцлов.
Дараа нь уулзалтад оролцогчдын тавьсан асуултад Монгол Улсын Ерөнхийлөгч хариуллаа. Тэд Монголын үндэстэн ястны талаар, хэрхэн сайн засаглал бүрдүүлж, авлигыг хэрхэн бууруулсан туршлагаас асууж сонирхов.