Монгол Улсын Ерөнхийлөгч Монголын гол нууруудын нэгдсэн хөдөлгөөний төлөөлөгчдийг хүлээн авч уулзав.
Тус хөдөлгөөний зүгээс Монгол Улсын Ерөнхийлөгчид 4 асуудлаар Засгийн газарт чиглэл өгч хамтарч ажиллахыг хүслээ. Үүнд: нэгд, Гол мөрний урсац бүрэлдэх хэсэг, усны сан бүхий газрын хамгаалалтын бүс, ойн сан бүхий газруудыг улсын онц чухал объект болгон төрийн хамгаалалтанд авах, хоёрт, уул уурхайн олборлолтоос үүсэн гарсан экологид учирсан хохирол болон ирээдүйд учирч болох хохирлын хэмжээг бүх нутаг дэвсгэрт тооцож гаргах. Гуравт: Энэ хуулийн үйлчлэх хүрээнд үндэсний язгуур эрх ашиг, үндэсний аюулгүй байдлын бүрэлдэхүүн хэсэг бүхэлдээ хөндөгдөж байгаа тул Засгийн газар хуулийн хэрэгжилтийн явцыг улирал тутамд Ерөнхийлөгчид танилцуулж ажиллах, дөрөвт: “Монгол Улсын Ерөнхийлөгчийн тухай” хуулийн 13 дугаар зүйлийн 2, 4 дэх заалтын дагуу тус хуулийн хэрэгжилтийн талаархи мэдээллийг Засгийн газар ойрын хугацаанд Ерөнхийлөгчид танилцуулж, олон нийтэд мэдээлэх зэргээр хүсэлт гаргав.
Уулзалтын төгсгөлд, Монгол Улсын Ерөнхийлөгч хэлэхдээ, “Энэ хуулийг хэрэгжүүлэх нь монгол орны цөлжиж байгаа байгаль орчныг хамгаалахад чухал ач холбогдолтой юм. Харин хэрэгжүүлэхдээ гар аргаар алт олборлогчийн эрх ашгийг зохицуулах нь чухал байгаа юм. Ингэхгүйгээр дан ганц захиргааны аргаар шийдвэрлэх боломжгүй. Хамгаалалтын асуудлыг иргэдийн оролцоотой шийдэх нь оновчтой байх болно гээд Усан цахилгаан станцууд сөрөг үр дагавар ихтэй байгаад анхаарч, цаашид орон нутгийн эрчим хүчний асуудлыг нар, салхины аргаар шийдвэрлэх талаар ажиллах нь зүйтэй юм” гэв.
