Монгол Улсын Ерөнхийлөгчийн санаачилсан хууль тогтоомжийн төсөл боловсруулах, хэлэлцэхэд олон нийтийн санал бодол, байр суурийг сонсох, нээлттэй, хяналттай төрийг төлөвшүүлэхэд Иргэдийн оролцоог бодитойгоор нэмэгдүүлэх зорилгоор Монгол Улсын Ерөнхийлөгчийн санаачилгаар 2009 оны 12 дугаар сарын 15 нд “Иргэний танхим”-ыг байгуулсан билээ.
Өнөөдрийг хүртэлх хугацаанд “Иргэний танхим”-аар “Хэвлэлийн эрх чөлөөний” тухай, “Шүүхийн” тухай, “Дээд боловсролын санхүүжилт суралцагчдын тэтгэлэг, тэтгэмж нийгмийн баталгаа”-ны тухай, “Төсвийн” тухай, “Эрүүгийн” хуульд нэмэлт өөрчлөлт оруулах тухай зэрэг 10 гаруй хуулийн төслийн хэлэлцүүлэг, “Төрийн бодлого боловсруулахад бид яаж нөлөөлөх вэ”, “Бичил бизнесийг дэмжих” тухай, “Шүүх эрх мэдлийн хүрээнд шинэтгэлийг гүнзгийрүүлэх хөтөлбөрийн” тухай хэвлэлийн бага хурал зэрэг бусад 22 удаагийн үйл ажиллагааг зохион байгуулж нийт 2000 гаруй иргэдийн 367 саналыг тэмдэглэн авч судалж байна.
Иргэний танхимыг танилцуулах ажлын хүрээнд өнөөдөр Канад Улсаас манай улсын гадаад хэлний багш нарын мэдлэгийг дээшлүүлэх сургалт зохион байгуулахаар ирсэн Канадын “Багш нарын холбоо”-ны сургагч багш Мария Ланней, Бэбэ Воконг, Анна Марие Маканзи, Арделе спрингэйт, Рондо фокс нар “Иргэний танхим”-ын үйл ажиллагаатай танилцлаа.
Учир нь Герман Улсын Бертелзман Стинфтунг байгууллагаас зохион байгуулж байгаа “Иргэдийн оролцоог нэмэгдүүлэх замаар Ардчиллыг сэргээх” гэсэн уриатай “Райнхард мон” шагналд “Иргэний танхим” нэр дэвшээд байна. Үүнтэй холбогдуулан иргэд, байгууллага, орон нутаг, гадаадын иргэдээс “Иргэний танхим”-тай танилцах хүсэлтийг ихээр гаргах болсон юм.
“Райнхард мон” шагналд санал өгөх хаяг:http://www.vitalizing-democracy.org/
