Эрхэм хүндэт наадамчид аа,
Эрхэмсэг зочид төлөөлөгчид өө,
Та бүхэнд олон зууны уламжлалтай Монгол наадмын халуун мэндчилгээг дэвшүүлье.
Монгол наадам нь манай ард түмний их түүх, ёс заншил, өвөрмөц уламжлал соёлын тод илэрхийлэл. Мөн төр улсынхаа бүрэн эрхт байдал, тусгаар тогтнол, эрх чөлөөгөө дээдэлсэн ард түмний маань баяр бахархал, өргөн их цэнгэл юм.
Монгол хүн бүрийн билэг ерөөл бүрэлдсэн, нар хур жигдэрсэн энэ өдөр өнгөрөгч наадмын маргаашаас бүтэн жил хүлээсэн улс үндэсний маань их баяр наадам эхэлж байна.
Монголоороо гоёсон энэ наадам ариун ёс журамтай, өргөн олноороо бахдан шагших бахархалтай, шинэ амжилт, гэгээн дурсамж дүүрэн байна гэдэгт итгэж байна.
Монгол хүн байгаа орон зай бүхэнд Монгол наадмын урь дэлгэрч, Монголоороо, түүх соёлоороо, ёс заншлаараа бахархах бахархал дүүрэн Монгол наадам газар бүр өнөөдөр болж байгаа.
Дэлхийд гайхагдсан Монгол үндэсний их баяр наадам нь зөвхөн Монголчуудын төдийгүй түүнд оролцож, сонирхож байгаа нийт зочид төлөөлөгчдийн баяр цэнгэл болдог. Мөн Монголчууд бид үндэсний баяр наадмаараа олон зуун, мянганаар тоологдох улс үндэстнийхээ үүсэл хөгжил, төрт ёсныхоо түүхэн уламжлалаа сэргээн дээдэлдэг. Үндэсний эрх чөлөөний хөдөлгөөн, ардын болон ардчилсан хувьсгалынхаа түүхэн ололтуудаа дурсан санадаг. Мөн өнгөрсөн хугацаанд хийж бүтээснээрээ, ололт амжилтаараа, бүтээл туурвилаараа.
бахархсан бүтээлч баяр болдог. Бас ирээдүйд хийж амжуулах ажил, бодлого, чиглэлээ ч ярилцдаг.
Монгол түмний их цагаан сүлд, хийморийн даллагатай, Монгол үндэсний их наадмын хоймроос азай буурал ахмадууд, цог золбоот залуус, балчир үрс, нийт ард иргэдийнхээ амар амгаланг дахин айлтгаж, хотол олноороо өргөн дэлгэр, шударга сайхан наадахын өлзийтэй ерөөлийг дэвшүүлье.
Эр бяр, хурд шандас, цэц мэргэний сорилготой Монгол наадамд оролцогч нийт ард иргэддээ өндөр амжилт, өргөн баяр цэнгэлийг хүсэн ерөөе.
Улс нийтээрээ эрх чөлөө, шударга ёс, эв нэгдлийг эрхэмлэн Монгол Монголоо дэмжин, хөгжин дэвжихийн их зорилгод нэгдэж хамтаараа урагшлацгаая.
Үндэсний баяр наадмаа ийнхүү ёс төр, билэг ерөөл дүүрэн эхлүүлж байгаагаа бүхий олонд тунхаглан сонордуулъя.
