Монгол Улсын Ерөнхийлөгчийн мэндчилгээ Эрүүл мэндийн яам байгуулагдсаны 80 жилийн ойд
Эрүүл мэндийн яам байгуулагдсаны 80 жилийн ойд
Өнөөгийн Монгол орон даяар бий болсон эрүүл мэндийн өргөн тогтолцооны гал голомт, эрүүл мэндийн асуудал эрхэлсэн төрийн захиргааны төв байгууллага-Эрүүл мэндийн яам байгуулагдсаны 80 жилийн ойг тохиолдуулан үе үеийн хамт олон, эмч мэргэжилтнүүдэд чин сэтгэлийн мэндчилгээ дэвшүүлж, баяр хүргэе.
Монгол Улсын анхдугаар Үндсэн хуульд “хүний өвчин эмгэгийг анагаан засах, сэргийлэх дүрэм хэмжээг тогтоох” хэмээн заасны дагуу 1925 онд Дотоод яамны дэргэд Ардын эрүүлийг хамгаалах газрыг байгуулж, улмаар 1930 онд Улсын зургаадугаар их хурлын шийдвэрээр Ардын эрүүлийг хамгаалах яам болгон өргөжүүлснээр Эрүүл мэндийн асуудал эрхэлсэн төрийн захиргааны төв байгууллагын үндэс суурь тавигдсан билээ.
Эрүүл мэндийн салбарт хууль эрх зүйн орчинг бүрдүүлж, эдийн засаг, санхүү, удирдлага зохион байгуулалтын хувьд бэхжүүлэх, эрүүл мэндийн тусламж, үйлчилгээ, урьдчилан сэргийлэх ажлын чанарыг олон улсын стандартын түвшинд ойртуулах, эрүүл мэндийн байгууллагуудыг орчин үеийн оношлогооны техник, тоног төхөөрөмж, мэргэжлийн өндөр түвшинд бэлтгэгдсэн эмч, эмнэлгийн мэргэжилтнээр хангах, дэлхийн улс орнууд, олон улсын байгууллагуудтай нягт хамтран ажиллах бодлогыг амжилттай хэрэгжүүлж, үндэсний хэмжээнд эрүүл мэндийн өргөн сүлжээг бий болгож чадсан нь Эрүүл мэндийн яамны үе үеийн удирдлага, эмч, мэргэжилтнүүдийн уйгагүй хөдөлмөр зүтгэлийн үр дүн гэдгийг бахархан тэмдэглэж байна.
Даяаршиж буй дэлхий ертөнцөд анагаахын шинжлэх ухааны шинэ ололтууд хурдацтай түгэн дэлгэрч буй энэ цаг дор улс үндэстнийхээ эрүүл мэндийн хэрэгцээг дэлхийн түрлэгтэй чадварлаг хослуулж, олон улсын эрдэм шинжилгээний хамтарсан судалгааны орчилд идэвхтэй байр суурь эзэлж, анагаах эрдмийн шинэ, шилдэг арга ухаанаас байнга суралцаж, дэлхийн эрүүл мэндийн байгууллагатай нягт хамтран ажиллаж, хөдөөгийн хүн амд үзүүлэх эрүүл мэндийн тусламж, үйлчилгээний чанар, үр өгөөжийг улам бүр сайжруулж ажиллана гэдэгт Монгол Улсын Төрийн тэргүүн би итгэлтэй байна.
Ард иргэдийнхээ эрүүл мэндийн төлөө боловсрол, мэдлэг, хөдөлмөр зүтгэлээ зориулж ирсэн эмч, сувилагч, ажилтнуудынхаа нийгмийн асуудлыг онцгой анхаарч, халамж анхаарлаа харамгүй тавихын зэрэгцээ “эмчийн муугаас эндэнэ” гэдэг үгийг ямагт санаж, мэргэжил боловсролыг нь дээшлүүлэх, эрүүл мэндийн салбарын
ажилтнуудад хандсан иргэдийн гомдлыг багасгаж, хүн бүр мэргэжлийн ёс зүйгээ дээдлэн ажиллахыг энэ дашрамд тэмдэглэн хэлье.
Өнгөрсөн хугацаанд олсон амжилт ололтоо улам бататгаж, эрүүл мэндийн байгууллагуудын бүтэц зохион байгуулалтыг оновчтой болгох, хүний нөөцийн чадавхийг бэхжүүлэх, эрүүл мэндийн санхүүжилтийг боловсронгуй болгож орчин үеийн техник, технологийн дэвшлийг эмнэлгийн тусламж үйлчилгээний бүх шатанд нэвтрүүлэх замаар эрүүл мэндийн тусламж үйлчилгээг хүн арддаа тэгш, хүртээмжтэй, чанартай хүргэхийг Та бүхнээс хүсье.
Монголын эрүүл мэндийн салбарын жанжин штабын бодлого, үйл ажиллагаа онч мэргэн байх болтугай.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
Улаанбаатар хот, 2010 оны 09 дүгээр сарын 30
Монгол Улсын Ерөнхийлөгчийн мэндчилгээ Эрүүл мэндийн яам байгуулагдсаны 80 жилийн ойд
