Монгол, Македоны харилцааг хөгжүүлэх боломжийг хамтран эрэлхийлэхийн чухлыг тэмдэглэлээ
Монгол Улсын Ерөнхийлөгч Ц.Элбэгдоржид тус улсад суух Македоны Онц бөгөөд Бүрэн эрхт элчин сайд Оливер Шамбевски итгэмжлэх жуух бичгээ өнөөдөр өргөн барив.
Ерөнхийлөгч Ц.Элбэгдорж түүнийг итгэмжлэх жуух бичгээ өргөн барьсантай нь холбогдуулан хүлээн авч уулзлаа. Ерөнхийлөгч Балканы хойгт энх тайван, аюулгүй байдлыг бий болгохын төлөөх дэлхийн хамтын нийгэмлэгийн хүч чармайлтыг Монгол Улс эхнээс нь дэмжиж байсныг дурдаад хоёр талын харилцаа, хамтын ажиллагааг шинэ нөхцөлд нийцүүлэн хөгжүүлэх боломжийг хоёр тал хамтран эрэлхийлэх, янз бүрийн түвшинд төлөөлөгч харилцан солилцохын чухлыг тэмдэглэсэн юм.
Элчин сайд Оливер Шамбевски 1973 онд Македоны Скопье хотод төрж, Гэгээн Кирил Методийн нэрэмжит их сургуулийн хэл зүйн салбарыг Македон ба Өмнөд славын утга зохиолын мэргэжлээр төгссөнөөс гадна Үндэсний түүхийн институтэд Визант гүрний сэдвээр эрдмийн зэрэг хамгаалжээ. Англи, итали, франц, испани хэлтэй. Эхнэр, хоёр хүүхэдтэйгээ амьдардаг.
Тэрээр Европын Зөвлөл дэх Соёлын комиссын гишүүн, парламентын Соёлын байнгын хорооны дарга, Европын Зөвлөлийн Парламентын Ассамблей дэх Бүгд Найрамдах Македон Улсын парламентын төлөөлөгчдийн тэргүүн, Европын Зөвлөлийн Парламентын Ассамблейн дэд ерөнхийлөгч зэрэг нэр хүндтэй албыг хашиж иржээ.
Бүгд Найрамдах Македон Улс бүх нийтийн санал асуулгын дүнд 1991 онд хуучин ХБНСЮУ-ын бүрэлдэхүүнээс гарч, тусгаар тогтнолоо тунхагласан юм. Монгол Улс 1995 онд тус улстай дипломат харилцаа тогтоосон бөгөөд Македон улсаас манай улсад Бээжингээс хавсран суух анхны элчин сайд 2007 онд итгэмжлэх жуухаа барьж байжээ.
Монгол, Македоны харилцааг хөгжүүлэх боломжийг хамтран эрэлхийлэхийн чухлыг тэмдэглэлээ
