Ерөнхийлөгч суурин төлөөлөгчийн анхаарлыг төвлөрлийг сааруулах асуудалд хандуулав
Монгол Улсын Ерөнхийлөгч Ц.Элбэгдорж Дэлхийн банкны шинэ суурин төлөөлөгч Корали Гэвэрс, Монгол Улсыг хариуцсан бүсийн захирал ноён Клаус Рохланд нарыг өнөөдөр хүлээн авч уулзлаа.
Ерөнхийлөгч Ц.Элбэгдорж хэлэхдээ “Монгол Улсад Дэлхийн банк сайн тусалж байгаа. Олон улсын хөтөлбөрүүдийг Монгол Улсад хэрэгжүүлэхэд Дэлхийн банк гол үүрэгтэй оролцож ирлээ. Төсвийн тухай хуулийн төслийг УИХ-д өргөн бариад байгаа. Төсвийн эрх мэдлийг орон нутагт өгөх асуудал чухал байна.
Манай оронд авилгатай тэмцэж, нийгмийн орчин, хуулийн хэрэгжилтийг сайжруулах, шударга ёс тогтоох, , шүүхийн шинэчлэл хийх хэрэгтэй байна.
Монгол Улсад байнгын ажиллагаатай парламент үүсч байгуулагдсаны 20 жилийн ойн хүндэтгэлийн чуулганд саяхан хэлсэн үгэндээ манай оронд хамгийн тулгамдсан асуудлуудын талаар хөндөж ярьсан.
Иргэний оролцоог нэмэгдүүлэх манай санал санаачилгыг Дэлхийн банк дэмждэгт бид баяртай байна. Дэлхийн банк дэлхий дахинд үйл ажиллагаагаа явуулдаг сайн туршлагатай. Монгол Улсад ч үлгэр жишээ болохуйц туршлага бий. Манай улс уул уурхайн салбар руу анхаарлаа төвлөрүүлж байна. Ирэх 10-20 жил гэхэд бид уул уурхайгаас гадна өндөр технологи, бусад салбарын чадавхиа хөгжүүлэх шаардлагатай байгаа. Таныг шинэ санаа, шинэ санаачилга гаргаж, шинэ эрч хүчээр Монгол оронд ажиллахыг хүсье” гэлээ.
-УИХ-ын хүндэтгэлийн чуулганд Таны хэлсэн үгийг сонсч, бас уншсан. Би ч мөн Таны нэгэн адил Монгол орны төлөө хичээн ажиллах болно. Санхүүгийн тогтвортой байдал нь нэн чухал. Монгол Улсаас суралцах зүйл ч бий гэж хатагтай Гэвэрс ярив.
Тэрээр Белги улсын иргэн бөгөөд 1996 оноос Дэлхийн банкинд туслах, зөвлөх, эдийн засагч, ахлах эдийн засагч, хөтөлбөрийн зохицуулагч зэрэг ажил хийж байжээ. Энэ ажилд томилогдохынхоо өмнө Дэлхийн банкны Зүүн Ази, Номхон далайн бүс нутаг хариуцсан дэд ерөнхийлөгчийн зөвлөхийн алба хашиж байсан юм.
Ерөнхийлөгч суурин төлөөлөгчийн анхаарлыг төвлөрлийг сааруулах асуудалд хандуулав
