Монгол Улсын Ерөнхийлөгчийн дэргэдэх “Иргэний танхим”-ын билгэ тэмдэг /лого/-г зохиох бүтээлийн уралдаан зарлаж байна
Монгол Улсад засгийн бүх эрх ард түмний мэдэлд байх бөгөөд улмаар ард түмэн төрийн үйл хэрэгт шууд оролцож, сонгож байгуулсан төрийн эрх барих төлөөлөгчдийн байгууллагаараа уламжлан энэхүү эрхээ эдлэхийг Монгол Улсын Үндсэн хуульд заан баталгаажуулсныг удирдлага болгон олон нийтийн эрх ашгийг хөндсөн аливаа асуудлаар шийдвэр гаргах, төрийн бодлого боловсруулахад иргэн бүрийн оролцоог бий болгох, иргэн төвтэй төрийн тогтолцоонд шилжих, нийгмийн хариуцлага, хяналт, ил тод, нээлттэй байдлыг хангах зорилгоор Монгол Улсын Ерөнхийлөгч Цахиагийн Элбэгдорж “Иргэний танхим”-ыг санаачлан байгуулснаас хойш нэг жил үйл ажиллагаагаа хэрэгжүүлж ирлээ.
Монгол Улсын Ерөнхийлөгчийн дэргэдэх “Иргэний танхим” байгуулагдсаны 1 жилийн ойг тохиолдуулан иргэн Таны оролцоо, авъяас билгийг өрсөлдүүлэн тус танхимын билгэ тэмдгийг /цаашид лого гэнэ/ зохиох бүтээлийн уралдааныг нийт ард иргэд, зураач, дизайнер, уран бүтээлчдийн дунд зарлаж байна. Уралдаанд шалгарсан бүтээл нь цаашид тус байгууллагын лого болно.
“Иргэний танхим”-ын эрхэм зорилго
Монгол Улсын Ерөнхийлөгчийн санаачлах хууль, нийтээр дагаж мөрдөх эрх зүйн актын төсөл, нийгмийн тулгамдсан асуудлуудыг ард нийтээр хэлэлцүүлж иргэдийн санал бодол, байр суурийг тусгах, төрийн бодлого боловсруулах, хууль тогтоох явцад иргэдийн оролцоог хангах замаар нээлттэй, хяналттай, хариуцлагатай иргэний нийгмийг төлөвшүүлэхэд оршино.
Уралдаанд ирүүлэх бүтээлд тавих шаардлага:
· Лого нь тус байгууллагынэрхэм зорилго, үйл ажиллагаа, онцлогийг товч, тодорхой тусгасан сэтгэлгээний өндөр түвшинд хийгдсэн байна.
· Adobe Photoshop, Corel Draw зэрэг мэргэжлийн програм дээр хийгдсэн байна.
· Лого нь өндөр нягтралтай /300 dpi/-с дээш байх шаардлагатай бөгөөд уралдаанд ирүүлэх бүтээлээ CD болон DVD дээр бичсэн tiff, jpeg форматтай бүтээлүүдийг хүлээн авна.
· Логоны дизайн нь хар, цагаан, улаан болон өнгөт гадаргуу дээр хэвлэгдэхээр зохиогдох бөгөөд жижгээс том хүртэл хэмжээг нь өөрчилж болохоор зохиогдоно. Лого нь интернет, CD-ROM, TB, видео, сурталчилгааны самбар, сонин сэтгүүл, албан бланк, ил захидал, сурталчилгааны материал, зурагт хуудас, даавуун болон бусад материалууд дээр хэвлэгдэх боломжтой байна.
· Уран бүтээлчид зөвхөн өөрийн зохиосон дизайнаар оролцох бөгөөд бусад бүтээл /лого/-ноос хуулсан, санаа авсан бүтээлүүдийг хүлээн авахгүй.
· Уралдаанд шалгарсан бүтээл /лого / нь байгууллагын өмч болж оюуны өмчийн патентаар хамгаалагдана.
· Уралдаанд нэг уран бүтээлч хэдэн ч загвараар оролцож болох бөгөөд бүтээл тус бүрийг тайлбарласан тайлбарыг хавсаргана.
· Овог нэр, холбоо барих утасны дугаар, ажлын болон оршин суугаа хаягаа бүтээлийг битүүмжилж ирүүлсэн дугтуйн дээр тодорхой бичсэн байна.
Хүлээн авах хугацаа:
Бүтээлийг 2010 оны арваннэг дүгээр сарын 21-ний өдрөөс арванхоёр дугаар сарын 10-ны өдрийг хүртэл ажлын цагаар хүлээн авна.
Шалгаруулалт
Бүтээлийг”Иргэний танхим” байгуулагдсаны 1 жилийн ой тохиох 2010 оны арванхоёрдугаар сарын 15-ны өдөр “Иргэний танхим”-ын нээлттэй хэлэлцүүлгээр иргэдийн саналаар сонгон шалгаруулна.
Эзлэх байр:
· Нэгдүгээр байр /нэг/ Ерөнхийлөгчийн Тамгын Газрын “Өргөмжлөл”, 300 000 төгрөгийн мөнгөн шагнал
· Дараагийн шилдэг таван бүтээлд тус бүрт “Талархалын бичиг”, 100 000 төгрөгийн мөнгөн шагналыг тус тус олгоно.
“Иргэний танхим”-ын хаяг:
· Утас: 263489
· Факс: 976-51-263486
· Захидлаар: Төрийн Ордон зүүн жигүүр, 373 тоот “Иргэний танхим”
“Иргэний танхим”-ын ажлын алба
Монгол Улсын Ерөнхийлөгчийн Тамгын Газар
Монгол Улсын Ерөнхийлөгчийн дэргэдэх “Иргэний танхим”-ын билгэ тэмдэг /лого/-г зохиох бүтээлийн уралдаан зарлаж байна
