Монгол Улсын Ерөнхийлөгч Дорнод аймагт ажиллаж байна
Монгол Улсын Ерөнхийлөгч Ц.Элбэгдорж орон нутаг дахь томилолтоо зүүн аймгуудад үргэлжлүүлэхээр Дорнод аймгийн Чойбалсан хотод хүрэлцэн ирлээ. Ерөнхийлөгчийг хүндэтгэн цэргийн хүрээний хүндэт харуул жагсаж аймаг орон нутгийн удирдлага угтав.
Тус аймагт Ерөнхийлөгчийг дагалдан УИХ-ын гишүүн П.Алтангэрэл, Д. Одбаяр, ХХААХҮ-ийн сайд Т.Бадамжунай, Ерөнхийлөгчийн зөвлөх Л.Эрхэмбаяр, Р.Болд болон авто зам, ашигт малтмал, нийгмийн хамгааллын салбарын мэргэжилтнүүд ажиллаж байна
Ерөнхийлөгч аймгийн төвийн “Хэрлэн Номин” худалдааны төвд очиж бизнес эрхлэгч иргэдтэй уулзлаа.
“Номин” компанийнхан 12 жилийн турш ашиглалтгүй байсан хивсний үйлдвэрийг засч, 2009 оны есдүгээр сард худалдааны төвөө албан ёсоор нээжээ. Нийтдээ 5 га талбай бүхий томоохон байгууламжийн тавны нэгд хүнс барааны лангуу, бөөний төв, хүнсний зоорь, хөргөгч, мах боловсруулах цех ажиллуулж байна. Үлдсэн талбайд спорт залууд, усан сан, зочид буудал барихаар төлөвлөж байна гэж худалдааны төвийн захирал Д.Болдбаяр ярив.
Хэдийгээр алслагдсан бүс нутаг боловч хоёр хөрш улстай хил залгадаг, хүн ам харьцангуй олонтой, дэд бүтэц сайн хөгжсөн, дулааны цахилгаан станц, мах, махан бүтээгдэхүүний үйлдвэр, зүүн бүсийн оношилгоо эмчилгээний төвтэй зэрэг нь бизнес эрхлэгчдэд давуу талтай ажээ. “Хэрлэн Номин” худалдааны төвийн бусад хэсэг ашиглалтад орсноор 1000 гаруй ажлын байр шинээр бий болох бөгөөд энэ нь аймгийн иргэдийн амьжиргааг дээшлүүлэхэд төдийгүй хөдөө орон нутгийг хөгжүүлэхэд хувийн хэвшлийн зүгээс санаачилан хийж буй том хөрөнгө оруулалт юм.
Ерөнхийлөгч Дорнод аймгийн шинэ бүтээн байгуулалт, зарим төрийн байгууллагын үйл ажиллагаатай танилцаж, иргэдтэй уулзлаа. Маргааш Халх гол суманд загвар аж ахуй байгуулах гэрээнд гарын үсэг зурах ёслолд оролцоно.
Монгол Улсын Ерөнхийлөгч Дорнод аймагт ажиллаж байна
