Ерөнхийлөгч хөдөөгийн сургуулийн үйл ажиллагаатай танилцав
/Монгол Улсын Ерөнхийлөгч Ц.Элбэгдорж Сүхбаатар аймагт ажиллаж байна./
Монгол Улсын Ерөнхийлөгч Ц.Элбэгдорж зүүн аймгууд дахь томилолтоо үргэлжлүүлж байна. Тэрээр өнөөдөр /гуравдугаар сарын таванд/ Сүхбаатар аймгийн Баруун-Урт суманд ирлээ.
Ерөнхийлөгч эхлээд“Тэмүүлэл” цогцолбор сургуулийн үйл ажиллагаатай танилцав. БСШУЯ улсын хэмжээний 670 гаруй сургуулиас шилдэг менежменттэй 20 сургууль шалгаруулахад тэдний нэгээр эднийх шалгарчээ.
“Хөдөөгийн нөхцөлд орчин үеийн сургалтын арга зүйг хослуулан явуулж, багш нарын мэдлэг чадварыг сайжруулах чиглэлээр үр дүнтэй ажиллаж байна гэж манай сургуулийг шилдгээр шалгаруулсан. Сурагчдын сурлагын болон хот хөдөөгийн олимпиадуудад оролцсон амжилт, ажлын зохион байгуулалт, төлөвлөлт зэрэг бусад үзүүлэлт ч нөлөөлсөн” гэж сургуулийн захирал Г.Чулуунбаатар ярив.
Мянганы сорилын сангийн дэмжлэгээр зөвхөн сургууль, багш, ажилчдын гэр бүлийн хүрээнд тамхинаас татгалзах тусгай хөтөлбөр хэрэгжүүлж байгаа юм байна.
Хэдийгээр амралтын өдөр ч 4 дүгээр ангийн сурагчид удахгүй болох математикийн олимпиадад бэлдэн хичээллэж байв. Улсын тэргүүний багш О.Батзаяа хүүхдүүдтэй ажиллаж байлаа. Ерөнхийлөгч багш, хүүхдүүдтэй сурах бичиг, сургалтын хөтөлбөрийн талаар ярилцаж, санал солилцлоо.
Ерөнхийлөгч хөдөөгийн сургуулийн үйл ажиллагаатай танилцав
