ОХУ-ын Ерөнхийлөгч Д.А.Медведевийн Монгол Улсад хийж буй төрийн айлчлалын хүрээнд өнөөдөр өглөө 9 цагт хоёр улсын тэргүүд Халхын голын байлдааны ялалтыг зохион байгуулж, удирдсан гарамгай жанжин Г.К. Жуковын хөшөөнд цэцэг өргөлөө.
Цэцэг өргөх ёслолын үеэр Халын голын дайнд оролцсон нэр бүхий ахмад дайчдад хоёр орны төрийн тэргүүд шагнал гардуулсан юм.
Үүнд:
Дугарын Гунгаа, Пунцагийн Шагдарсүрэн, Баяндалайн Сааралдай, Хөнгөцийн Лувсандорж, Чойндогийн Ган-Очир, Долгорын Батаа, Цагааны Дамдинжав, Цогтын Гэндэндаржаа, Доржийн Хорлоо, Дуламын Тэгш-Ерөөлт нарыг Оросын Холбооны Улсын Ерөнхийлөгч Д.А.Медведевийн зарлигаар “Найрамдал” медалиар шагнасан бол Монгол Улсын Ерөнхийлөгч Ц.Элбэгдоржийн зарилгаар Горбатко Виктор Васильевич, Богданов Николай Григорьевич, Смирнов Владимир Васильевич, Бабушкин Владимир Алексеевич нарыг “Алтан гадас” одонгоор, Завидонов Юрий Николаевичийг “Халхын голын 70 жил”-ийн ойн медалиудаар тус тус шагналаа.
Тус арга хэмжээний үеэр Халхын голын дайнд оролцсон Оросын төлөөлөгчдийн тэргүүн, “Монголын анд нөхдийн нийгэмлэг”-ийн Тэргүүн, ЗХУ-ын хоёр удаагийн баатар, ОХУ-ын сансрын нисгэгч Горбатко Виктор Васильевич Монгол Улсын Ерөнхийлөгч Ц.Элбэгдоржид ОХУ-ын “Халхын гол-70” медалыг гардуулсан юм.
Дараа нь Монгол Улсын Ерөнхийлөгч Ц.Элбэгдорж ахмад дайчдад хандаж хэлсэн үгэндээ: “Монгол Улсын тусгаар тогтнол, бүрэн эрхт байдлын төлөө амь насаа үл хайрлан цэл залуу насаа зориулсан Та бүгдийн гавъяа Монголын ард түмний сэтгэл зүрх, Монголын үе үеийн төр засгийн оюун мэлмийд үүр мөнхрөн дурсагдах болно” гэж онцолсон юм.
Түүний дараа ОХУ-ын Ерөнхийлөгч Д.А.Медведев Халхын голын байлдааны 70 жилийн ойг тэмдэглэн өнгөрүүлж буй хоёр орны ард түмэнд хандаж хэлсэн үгэндээ: “Энэ бол үнэхээр бидний хамтын ялалт байсан юм. Хичнээн арван жил өнгөрсөн ч бидний ард түмэн тэдгээр өөрсдийн амьдралаараа төлсөн өнөөгийн үеийнхний энх тайван, ирээдүйн аз жаргалтай байх эрхийг хангаж өгсөн хүмүүсийг үргэлж санаж явах болно” гэж хэлсэн юм.
Тус арга хэмжээний дараа хоёр орны тэргүүд Соёлын төв өргөөнд болох Баярын хурал, баярын концертыг үзэхээр мордов.
