Монгол Улсын Ерөнхийлөгч Сүхбаатар аймгийн Мөнххаан суманд ажиллав

2011 оны 03-р сарын 06-нд Бусдад түгээх

Монгол Улсын Ерөнхийлөгч Ц.Элбэгдорж зүүн аймгууд дахь томилолтоо Сүхбаатар аймгийн Мөнххаан суманд үргэлжлүүллээ. Мөнххаан уулын ар бэлд Эрээн хөшиг гэдэг нутагт хаваржиж байгаа тус сумын малчин Н.Батбаатарынд Ерөнхийлөгч зочилж, хаваржилтын байдалтай танилцав. Н.Батбаатарынх гурван гэрээрээ хаваржиж байна. Хонь, үхэр, адуу голдуу 500-гаад толгой малтай ажээ. “ Өнгөрсөн зун бэлчээрийн гарц сайн байсан. Өвөл ч цас багатай, дулаахан сайхан болж байна. Бид өвс хадлангаа сайн бэлдсэн. Нэг ч малын хорогдолгүй хаваржиж байна” гэж залуу малчин ярилаа. Н.Батбаатарын ээж Д.Өлзий ярианд оролцож, төр засгаас эхчүүдэд хандсан сайхан бодлого явуулж буйд талархаж байгаагаа хэлэв. “Би 11 хүүхэд төрүүлж өсгөсөн. Алдарт эхийн 1, 2 дугаар зэргийн одонтой. Шинэ хууль гарч 4 хүүхэд төрүүлж өсгөсөн эх одон авах болсонд би эхчүүдийн өмнөөс баярлаж сууна” гэж ярилаа. Сумын Засаг дарга Ч.Ганболд сумынхаа хаваржилтын тухай товчхон танилцуулав. Сүхбаатар аймгийн Мөнххаан сум 4300 хүн амтай, аймагтаа харьцангүй томд орох сум юм байна. Мал сүрэг 5 төрлөөр өссөн, төрөөс явуулж байгаа жижиг дунд үйлдвэрийг дэмжих бодлогын хүрээнд үйлдвэрлэл нэмэгдэж сүүний 3 ферм, эсгийний 2 үйлдвэр ажиллаж байгаа юм байна. “Малчид отор нүүдэл их хийдэг учраас тэдний хүүхдэд сургуулийн байр хүрэлцдэггүй. Одоо нийт 960 хүүхэд дунд сургуульд сурч байна. Сумын хэмжээнд цэцэрлэгийн насны 500 орчим хүүхэд байгаа ч, цэцэрлэгт явж байгаа нь дөнгөж 200. Энэ нь мөн л байрны хүрэлцээтэй холбоотой. Тиймээс манай суманд дэмжлэг үзүүлж, сургууль, цэцэрлэгийн байрыг өргөтгөх, шинээр барихад анхаарч өгнө үү” гэж сумын Засаг дарга ярилаа. Ерөнхийлөгчийг дагалдан ажиллаж байгаа БСШУЯ-ны төрийн нарийн бичгийн дарга Б.Мишигжав энэ асуудлыг судалж үзэхээ амлав. Дараа нь Ерөнхийлөгч Мөнххаан сумын иргэд, малчидтай уулзалт хийгээд Хэнтий аймгийг зорилоо.