Монгол улсын иргэн сансарт ниссэний 30 жилийн ойн баярт оролцогсодод
Олон улсын сансрын хамтын ажиллагааны “Интеркосмос” хөтөлбөрийн хүрээнд Монгол Улсын иргэн Жүгдэрдэмидийн Гүррагчаа, Орос анд Владимир Женибековын хамт сансарт ниссэний 30 жилийн ойн баярын ёслолд оролцож байгаа Сансрын баатрууд, Эрдэмтэн судлаачид, Иргэд Та бүхэнд баярын мэнд дэвшүүлж, ажил амьдралын сайн сайхан бүхнийг хүсэн ерөөе.
“Салют-6”-“Союз Т-4”-“Союз-39” цогцолбороор хийсэн сансрын хамтарсан нислэг нь эртнээс нөхөрсөг харилцаатай, найрсаг хөрш Монгол-Оросын хамтын ажиллагааны нэгэн тод илэрхийлэл, эвийн хүчээ газраас сансарт хүртэл дээдэлсэн гэгээн үйлс, шинжлэх ухааны хөгжлийн нэгэн шинэ хуудас болсон билээ.
30 жилийн тэртээ Монгол Улсын иргэн Дэлхийн сансрын 101 дэхь нисэгч, Монгол улс сансарт хүнээ нисгэсэн 10 дахь орон, сансрын багаж хийж туршсан 20 дахь орон болж байсаныг бахархан дурсаж байна.
Монгол Улсын иргэн шинжлэн судлагч сансрын нисэгчээр ажилласан энэхүү хамтарсан нислэг нь манай орны төдийгүй дэлхийн шинжлэх ухаанд хувь нэмэр оруулсаныг тэмдэглэвэл зохино.
Сансрын хамтарсан нислэгийн үед Сансрын физик, технологи, Эмнэлэг-биологи, Дэлхийг зайнаас тандан судлах чиглэлээр 25 туршилт хийсэн нь үүний нотолгоо юм.
Эдгээр туршилт судалгааны үр дүн эдүгээ бүрэн гарч, цаашдын судалгааны чиглэлээ тодруулсаны дээр манай эрдэмтэн судлаачид холбогдох чиглэлээрээ сансрын мэргэжлийн эрдэмтэдтэйгээ хамтран ажилласаар байгаа төдийгүй сансрын геодези, геоинформатик, зайнаас тандан судлахуй, сансраас мэдээлэл хүлээн авах, дамжуулах,боловсруулах зэрэг болон бусад олон салбарт төр, хувийн хэвшлийн байгууллагууд арвин их үр бүтээлтэй ажиллаж байгаад талархал илэрхийлье.
Монголын эрдэмтэн судлаачид судалгаа шинжилгээнийхээ ажлын хүрээг тэлж суурь болон хавсрага шинжлэх ухааны олон чиглэлээр эрч хүчтэй, өгөөжтэй ажиллаж сансрын судалгаа төдийгүй эх орныхоо хөгжил цэцэглэлт, мандал бадралд дорвитой хувь нэмэр оруулах эрдэм судлалыг хөгжүүлнэ гэдэгт төрийн тэргүүн би бат итгэж байна.
Энэ үйлсэд Монголын Улсын Шинжлэх ухааны академи оройлон оролцож, амжилт олно гэдэгт эргэлзэхгүй байна.
Эрдэм номын ариун үйлс эгнэгт дэлгэрэх болтугай.
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
Улаанбаатар хот
2011 оны 3 дугаар сарын 22
