Ерөнхийлөгчийн дэргэдэх “Иргэний танхим”-д Архигүй Монголын төлөө Үндэсний сүлжээнд нэгдэн орсон төрийн болон төрийн бус байгууллагууд Хууль зүй, дотоод хэргийн яамны шинэчлэн найруулж боловсруулж буй “Архидан согтуурахтай тэмцэх тухай” хуулийн төсөлд санал авах нээлттэй хэлэлцүүлэг өнөөдөр боллоо.
Нээлттэй хэлэлцүүлэгт Хууль зүй, дотоод хэргийн дэд сайд В.Удвал оролцон хуулийн төслийг танилцууллаа. Дараа нь “Архигүй Монгол” үндэсний сүлжээний Соён гэгээрүүлэх болон хэвлэл мэдээллийн ажлын хэсгийн саналыг Монголын Эвэнгелийн эвслийн удирдах зөвлөлийн гишүүн Д.Амгалан, “Амьдралын алтан боломж” төрийн бус байгууллагын тэргүүн Ж.Цогтсугар нар, сүлжээний Эрүүл мэндийн тусламж, үйлчилгээний ажлын хэсгийн саналыг Монголын Эвэнгелийн эвслийн ерөнхий нарийн бичгийн дарга М.Батболд танилцуулав.
Хуулийн шинэ төслийг архи нь татвар орлого бүрдүүлэгч гэсэн утгаар бус хүнийг согтууруулагч бүтээгдэхүүн гэдэг байр сууринаас хандаж боловсруулж байгаа юм. Архины үйлдвэрлэл, худалдааг эдийн засгийн аргаар, онцгой татвар, стандарт, хэмжээ хязгаарлалт, хуулиар зохицуулахаар тооцож буй юм байна.
Архины үйлдвэрлэл, худалдаанд хяналт тавьдаг хүмүүст хариуцлагагүй хандсан тохиолдолд авах арга хэмжээг чангатгах, архи, архидалттай тэмцэхэд татварын орлогоос тодорхой хэсгийг хуваарилдаг байх, технологи, стандарт хангаагүй үйлдвэрийг хаах, төрийн албан хаагчид, төрийн аливаа арга хэмжээнд архи хэрэглэхийг хориглох, архидахийг хориглодог уламжлалыг хуулийн төсөлд зохих хувилбараар тусгах нь зүйтэй гэсэн санааг хэлэлцүүлэгт оролцсон хүмүүс асуулт асуух далимаар илэрхийллээ.
