Өнөөдөр төрийн ордны их танхимд Монгол Улсын Ерөнхийлөгчийн санаачилгаар анх удаа зохиогдож буй “Шүүх эрх мэдлийн шинэчлэл ба шударга ёс” Үндэсний чуулган нээлтээ хийлээ. Монгол Улсын Ерөнхийлөгч Цахиагийн Элбэгдорж Үндэсний чуулганыг нээж үг хэлсэн бөгөөд нийтдээ гадаад дотоодын 1000 гаруй зочид төлөөлөгчид оролцож байна.
Монгол Улсын Ерөнхийлөгч нээлтийг үг хэлсний дараа Төрийн ордны Их танхимд “Шүүхийн бие даасан байдал” сэдэвт нэгдүгээр салбар хуралдаан, төрийн ордны “А” танхимд “Иргэний хэрэг хянан шийдвэрлэх ажиллагаа” сэдэвт 2 дугаар салбар хуралдаан, Төрийн ордны “Б” танхимд “Прокурорын байгууллагын үйл ажиллагаа” сэдэвт 3 дугаар салбар хуралдаан, Төрийн Ордны “В” танхимд “Эрх зүйн боловсрол, үргэлжилсэн сургалт” сэдэвт 4 дүгээр салбар хуралдаанууд тус тус явагдаж байна.
Салбар хуралдаануудыг Доктор Б.Дэлгэрмаа, Үндсэн хуулийн цэцийг гишүүн Д.Наранчимэг, Үндэсний соёмбо хөдөлгөөний тэргүүн Б.Лхагважав, МУИС-ийн ХЗС-ийн багш Д.Ганзориг нар хөтлөн явуулж буй бөгөөд хуралдааны үндсэн оролцогчдоор Төрийн болон төрийн бус байгууллагын төлөөлөл, шүүх, прокурорын байгууллагын төлөөлөл, Олон улсын байгууллагын төлөөлөгчид, иргэний нийгмийн байгуулал, эрдэм шинжилгээ судалгааны төв, их дээд сургуулиудын төлөөлөгчид болон иргэд олон нийт өргөнөөр оролцож байна.
Ийнхүү хоёр өдөр үргэлжлэх Үндэсний чуулган өнөөдөр үдээс хойш “Шүүхийн зохион байгуулалт, хүртээмж”, “Захиргааны хэрэг хянан шийдвэрлэх ажиллагаа”, “Цагдаагийн байгууллагын үйл ажиллагаа”, “Ял шийтгэлийн хэрэгжилт”, “Шүүгчийн сонгон шалгаруулалт”, “Шүүхийн шийдвэр гүйцэтгэх ажиллагаа”, “Хохирогч, гэрчийн эрхийн хамгаалал” зэрэг салбар хуралдаануудаар үргэлжлэх болно.
Бид хуралдааны тухай дэлгэрэнгүй мэдээллийг болон Монгол Улсын Ерөнхийлөгчийн Үндэсний чуулганыг нээж хэлсэн үгийг www.president.mn цахим хаягаар удахгүй хүргэх болно.
