Дэлхий нийтэд нефтийг орлох гол эх үүсвэр болсон түлшний этанолыг монголд нэвтрүүлж эхэлснээ “Петровис” ХХК болон “Оргил Ойл” ХХК-иуд өнөөдөр зарлаж, нээлтийн ажиллагаанд Монгол Улсын Ерөнхийлөгч Ц.Элбэгдорж оролцлоо.
Эко-92 брэнд бензин нь агаарт ялгарах хорт утааны хэмжээг 30-40 хувь бууруулдгаараа нефтээс үйлдвэрлэдэг бусад түлшнээс давуу юм. Ийм учраас уг бензиныг хэрэглээнд нэвтрүүлэхийг Монгол Улсын Ерөнхийлөгч дэмжиж байна. Тэрээр нээлтийн ажиллагаанын үеэр хэлсэн үгэндээ “ Агаарын бохирдол, байгаль орчны доройтол, дэлхийн дулаарал зэрэг бидний өмнө тулгарч байгаа асуудлыг шийдвэрлэхэд нэг туслах хүчин зүйл нь энэхүү биоэтанол агуулсан түлш юм. Өнөөдөр дэлхийн олон орон бензинд түлшний этанолыг заавал нэмж хэрэглэхээр хуульчилсан байна. Эрдэнэшиш, спиртын шаар зэрэг түүхий эдээс гаргаж авдаг этанолын хэрэглээ Монголд нэвтэрч байгаад баяртай байна.
Цаашдаа байгаль орчныг хамгаалах, агаарын бохирдлын эсрэг ийм санаачлагуудыг дэмжих болно” гэсэн юм.
Эко-92 түлшний анхны хэрэглэгч нь Монгол Улсын Ерөнхийлөгч Ц.Элбэгдорж боллоо.
