АНУ-д албан ёсны айлчлал хийж буй Монгол Улсын Ерөнхийлөгч Цахиагийн Элбэгдорж, АНУ-ын Ерөнхийлөгч Барак Обама нар 2011 оны 6 дугаар сарын 16-нд Цагаан ордонд уулзлаа. Ерөнхийлөгч Б.Обама Монгол Улсын Ерөнхийлөгч Ц.Элбэгдоржийг эх оронд нь тавтай морилж, айлчлалаа амжилттай хийхийг хүссэнээр уулзалт эхэллээ. “Монгол Улс ардчилсан нийгмийг сонгосноос хойш 20 жилийн энэ богино хугацаанд хүний эрх, эрх чөлөөг хангах, ардчиллыг бэхжүүлэх, эдийн засгаа хөгжүүлэх чиглэлд олсон амжилтыг би гайхан биширч байдаг. Ерөнхийлөгч Таны улс төрийн тавцанд хэрхэн гарсан, шийдвэр гаргахад оролцож байсан, улс орноо удирдаж байгаа түүхийг би мөн бахархаж байна. Хүний эрх, эрх чөлөөг дээдлэх, байгаль орчныг хамгаалах чиглэлээр Таны гаргаж байгаа санаачилгууд үнэлэхгүй байхын аргагүй юм.
Манай хоёр орны харилцаа иж бүрэн түншлэлийн хүрээнд жилээс жилд хөгжиж байгаад би сэтгэл хангалуун байдаг. Америк Улс, Монгол Улсын хувьд гуравдагч хөрш болж байдагтаа баяртай байдаг.
Бид энхийг сахиулах болон олон улсын байгууллагуудын хүрээнд нэг нэгнээ дэмжин тусалж, амжилттай хамтран ажиллаж байна. Энэ чиглэлээр цаашдаа ч хамтрах өргөн боломжууд бий болно гэдэгт эргэлзэхгүй байна” гэж Ерөнхийлөгч Б.Обама ярив.
Манай улсад ардчиллыг тогтоох үйлсийг анхнаас нь бүх талаар дэмжиж ирсэнд Америкийн Засгийн газар, ард түмэнд талархаж байгаагаа Монгол Улсын Ерөнхийлөгч илэрхийлэв. Бидний гуравдагч хөрш, ардчиллын өлгий болсон Америк орон сайхан хүлээж авч байгааг дурдлаа.
“Бид АНУ-тай худалдаа, эдийн засгийн харилцааг эрчимжүүлэх сонирхолтой байна. Өнөөдөр манай улсын Иргэний агаарын тээврийн компани “Боинг” компанитай хамтран ажиллахаар тохирч байна. Олон улсад нэр хүндтэй уул уурхайн зарим компани манай орны уул уурхайн тодорхой томоохон төслүүд дээр хамтрах хүслээ илэрхийлж, энэ чиглэлд ажиллаж байна. Мөн “Женерал электрик” зэрэг томоохон компаниуд хөрөнгө оруулж, хамтран ажиллахаар тохирлоо. Ингэж өндөр технологитой, өндөр хариуцлагатай, өндөр нэр хүндтэй компаниуд монголыг сонирхож байгаа нь бидний хүсэл сонирхолд нийцэж байгаа юм.
Монгол, Америк улсуудын хооронд худалдааны ил тод байдлын гэрээ байгуулах чиглэлд хоёр талаас ажиллаж байна. Удахгүй ажил хэрэг болох нь дамжиггүй” гэж Ерөнхийлөгч Ц.Элбэгдорж ярив.
Б.Обама Ерөнхийлөгч Ц.Элбэгдоржийг Вашингтонд ирэнгүүтээ Арлингтон дахь Дайчдын хөшөөнд цэцэг өргөж, Волтер Рийдийн цэргийн эмнэлэгт очиж шархадсан цэргүүдийг эргэж, тэднийг сэтгэл санаагаар дэмжсэнд талархаж байгаагаа хэллээ. Тэрээр Ерөнхийлөгч таны хэлсэн эдийн засгийн хамтын ажиллагааг эрчимжүүлэх хэрэгтэй гэдэгтэй би санал нэг байна. Манай Засгийн газар, миний баг аливаа ажлыг хийхдээ эрхзүйн үндсийг чухалчилдаг. Ил тод байдлын гэрээ байгуулах нь худалдаа, эдийн засгийн хүрээг тодорхой хэмжээнд хүргэх эрхзүйн гол баримт бичиг болох юм. Бид Япон, Солонгос зэрэг Азийн хэд хэдэн хүчирхэг оронтой, ЕХ-ны улсуудтай ил тод байдлын гэрээтэй ажилладаг. Эрхзүйн баталгаатай ажиллаж байж бид амжилтад хүрнэ.
Америк, Монгол хоёр сэргээгдэх эрчим хүчний салбарт хамтран ажиллах боломжтой. Манай улсад энэ талаар туршлагатай, сайн технологитой компаниуд олон бий. Хамтран энэ асуудлыг судалж үзнэ гэдэгт найдаж байна ” гэлээ.
Тэрээр мөн Монгол Улс ардчиллын төлөө хамтын нийгэмлэгийг энэ оноос даргалах гэж байгааг талархан хүлээж авч байна, дэмжиж ажиллах болно гэв.
Хоёр Ерөнхийлөгч, бүс нутгийн хүрээнд энхтайван аюулгүй байдлын чиглэлээр манай хоёр улсын зүгээс гаргаж байгаа хүчин чармайлтын талаар, мөн бүс нутаг, олон улсын зарим асуудлаар санал солилцож ярилцлаа.
Монгол, Америк улсуудын харилцаа, хамтын ажиллагааны түвшинг өндөрсгөхөд өндөр дээд хэмжээний айлчлалууд чухал гэдэгтэй энэ уулзалтын үеэр санал нэгдэв. АНУ-ын дэд Ерөнхийлөгч, Төрийн нарийн бичгийн дарга нарын айлчлалыг энэ онд багтааж Монгол Улсад хийлгэх асуудлаар ярилцав.
Монгол Улсын Ерөнхийлөгч Ц.Элбэгдорж АНУ-ын Ерөнхийлөгч Б.Обамаг эх орондоо айлчлахыг урилаа. Урилгыг Ерөнхийлөгч Б.Обама талархан хүлээж авав.
