Монгол Улсын Ерөнхийлөгч Цахиагийн Элбэгдорж, Петр Сагайдачнийгийн нэрэмжит Львовын Хуурай замын цэргийн Академид зочиллоо. Петр Сагайдачнийгийн нэрэмжит Львовын Хуурай замын цэргийн Академи нь Украин Улсын Батлан хамгаалах яамны харьяа, тус улсын тэргүүлэх сургуулийн нэг бөгөөд хуурай замын цэргийн офицер бэлтгэдэг нэр хүндтэй сургууль юм. Анх 1899 онд Австрийн цэргийн дунд сургууль нэрээр байгуулагдаж байсан. Австри-Унгарын эзэнт гүрнийг задарсны дараа Польшийн цэргийн дунд сургууль, дэлхийн 2-р дайны дараа Львовын Батлан хамгаалах–улс төрийн дээд сургууль, Цэргийн Дээд сургууль, Цэргийн хүрээлэн болгож тус тус өөрчлөн зохион байгуулж байжээ.
Харин 2000 оноос эхлэн, Украины үндэсний баатар, цэргийн жанжин Петр Корнашевич Сагайдачнийгийн нэрэмжит болгож, Львовын Хуурай замын цэргийн Академи болгон өөрчилжээ.
Өнөөдөр энэ Академи Украин Улсын Зэвсэгт хүчний хуурай замын цэргийн бүхий л чиглэлээр мэргэжлийн боловсон хүчин бэлтгэдэг болсон байна. Байлдааны урлаг, агаарын цэрэг, пуужингийн цэрэг, их буу болон цэргийн хэвлэл мэдээлэл, соёл урлаг, арын албаны мэргэжилтэн бэлтгэх 4 тэнхимтэй. Мөн автомашины засвар үйлчилгээний ажилтан, төрөл бүрийн албадын дарга нар, цэргийн үлээвэр хөгжимчдийг бэлтгэдэг цэргийн коллежтой юм байна.
Академи, Европдоо томд тооцогдох Олон улсын энхийг сахиулах, аюулгүй байдлын төвтэй бөгөөд тэнд сонсогчид болон бусад орны цэрэг офицерууд цэргийн хээрийн бэлтгэл сургалтаа хийж байна.
Петр Сагайдачнийгийн нэрэмжит Львовын Хуурай замын цэргийн Академид өнөөдөр мянга орчим сонсогч суралцаж байна.
Монгол Улсын Ерөнхийлөгч Цахиагийн Элбэгдорж энэхүү сургуулийг 1983-1988 онд цэрэг-улс төрийн сэтгүүлч мэргэжлээр суралцаж төгссөн билээ.
Ерөнхийлөгч Ц.Элбэгдоржийг хүндэтгэн Петр Сагайдачнийгийн нэрэмжит Львовын Хуурай замын цэргийн Академийн хүндэт харуул жагсч, Академийн захирал, дэслэгч генерал Павел Петрович Ткачук угтан авлаа.
Дараа нь Ерөнхийлөгч Хуурай замын цэргийн Академийн музейгээр зочиллоо. Энэ музейн хойморт, тус Академийн төгсөгч Ц.Элбэгдоржийн буланг 2009 оноос эхлэн нээжээ.
“Манай сургуулийн хувьд түүхэн чухал үйл явдлуудын нэг нь манай төгсөгч Ерөнхийлөгчөөр сонгогдсон явдал байлаа” хэмээн тус сургуулийн удирдлага Ц.Элбэгдоржийн буланг танилцуулах үеэрээ бахархан ярьж байсан юм.
100 гаруй жилийн түүхэндээ 26 оронд хэдэн арван мянган чадварлаг цэргийн боловсон хүчин, офицерууд, армийн лидерүүдийг төрүүлэн гаргасан тус сургууль одоо ч Европын хамгийн хүчирхэг, чадварлаг, материаллаг бааз, нэр хүнд сайтай сургууль хэвээрээ байгааг энэхүү Академийн түүхийн музейгээс үзэж болохоор байлаа.
