Монгол Улсын Ерөнхийлөгч Цахиагийн Элбэгдорж, Тэргүүн хатагтай Х.Болормаа нарын БНЭУ-д хийж байгаа Төрийн айлчлал үргэлжилж байна.
Айлчлалын 3 дахь өдөр буюу 9-р сарын 15-ны өдөр Ерөнхийлөгч, дагалдан яваа бүрэлдэхүүнийхээ хамт Мумбай хотод хүрэлцэн ирлээ.
Шива бурхны өлгий нутаг, эртний түүх, гар урчуудаараа алдаршсан Мумбай хот өнөөдөр Энэтхэг улсын хөгжлийг тодорхойлдог нүүр царай , Энэтхэгийн төдийгүй, дэлхийн бизнес санхүүгийн төв болж чадсан. Энэтхэгийн томоохон хөрөнгийн биржүүд, банк санхүүгийн төвүүд, далайн болон агаарын замууд энд байдаг.
Ерөнхийлөгч Ц.Элбэгдорж, Тэргүүн хатагтай Х.Болормаа нарт Махараштра муж улсын захирал С.Жамир бараалхлаа. Дараа нь тэрээр Монгол Улсын Ерөнхийлөгч, Тэргүүн хатагтай нарыг хүндэтгэн оройн зоог барилаа.
Маргааш Энэтхэгийн Аж Үйлдвэрийн холбоо, Худалдаа Аж Үйлдвэрийн танхимуудын холбоо, Худалдаа Аж Үйлдвэрийн танхимын гишүүн байгууллагуудын холбооноос хамтран зохион байгуулах бизнес уулзалтанд оролцож үг хэлнэ.
