Өнөөдөр Монгол Улсын Ерөнхийлөгч Цахиагийн Элбэгдорж Олон Улсын Эрүүгийн шүүхийн Ерөнхийлөгч ноён Сонг Санг-Хюнг хүлээн авч уулзав. Ноён Сонг Санг Хюн Монгол Улсын Ерөнхийлөгчид бараалхах үеэр найрсаг зочломтгой хүлээн авч уулзаж буйд талархал илэрхийлээд Монгол Улс ОУЭШ-ийн үйл ажиллагаанд санаачлагатай байдаг, мөн ОУЭШ-ийг байгуулах Ромын гэрээг анх батласан орнуудын нэг гэдгийг онцлон хэлэв.
Мөн тэрбээр Монгол Улсын Ерөнхийлөгчийн зарласан цаазаар авах ялын гүйцэтгэлд хориг тавих санаачилгыг үнэхээр чухал алхам болсон гэдгийг онцлон тэмдэглэж цаашид энэ санаачилгыг улам бүр дэмжин ажиллахаа илэрхийлэв.
Уулзалтын үеэр Монгол Улсын Ерөнхийлөгч хууль шүүхийн шинэтгэлийн асуудлаар баримталж буй өөрийн бодлого байр суурь, санаачилгаа танилцуулав.
Олон Улсын Эрүүгийн шүүх нь 2002 онд байгуулагдсан бөгөөд одоогоор дэлхийн 116 орон нэгдэн ороод байна. Тус шүүх Голланд улсын Гааг хотод байрлан хүн төрөлхтөний эсрэг гэмт хэрэг, дайны гэмт хэргийг Ромын гэрээний гишүүн орнуудаас ирсэн хүсэлтийн дагуу хүлээн авч шүүн хэлэлцдэг бөгөөд гишүүн бус орнуудын хувьд НҮБ-ын аюулгүйн зөвлөлөөс хүсэлт гаргаж болдог байна.
