Монгол Улсын Ерөнхийлөгч Цахиагийн Элбэгдорж НҮБ-ын Ерөнхий Ассамблейн 64 дүгээр чуулганд оролцохоор 2009 оны 9 дүгээр сарын 20-ны өглөө “Чингис хаан” олон улсын нисэх буудлаас мордлоо.

Монгол Улсын Ерөнхийлөгчийг дагалдан явах албан ёсны төлөөлөгчдийн бүрэлдэхүүнд Монгол Улсаас АНУ-д суугаа Онц бөгөөд бүрэн эрхт Элчин сайд Х.Бэхбат, Монгол Улсаас НҮБ-ын дэргэд суугаа байнгын төлөөлөгч, Элчин сайд О.Энхцэцэг, УИХ-ын гишүүн, УИХ дахь Ардчилсан намын бүлгийн дарга, Монгол-Америкийн бүлгийн дарга Ч.Сайханбилэг, УИХ-ын гишүн, Байгаль орчин, аялал жуулчлалын сайд Л.Гансүх, Гадаад харилцааны дэд сайд Б.Болор, Ерөнхийлөгчийн гадаад харилцааны бодлогын зөвлөх Ц.Сүхбаатар, Ерөнхийлөгчийн Эрдэс баялаг, эрчим хүч, дэд бүтцийн бодлогын зөвлөх П.Цагаан, Ерөнхийлөгчийн байгаль орчин, амьдрах орчны бодлогын зөвлөх Э.Зоригт, Ерөнхийлөгчийн Олон нийтийн харилцаа, нийтлэг бодлогын зөвлөх А.Ганбаатар, ГХЯ-ны Олон улсын байгууллагын захирал С.Онон нар болон албаны бусад хүмүүс багтаж байна.

Монгол Улсын Ерөнхийлөгч Ц.Элбэгдорж Нью-Йорк хотноо болох тус чуулганы үеэр Уур амьсгалын өөрчлөлтийн асуудлаар НҮБ-ын дээд хэмжээний уулзалтын хүрээнд болох дугуй ширээний уулзалтыг даргалах бөгөөд “News week”, “The Economist”, “Forbes”, “Bloomberg”, “Ройтерс” зэрэг дэлхийд алдартай мэдээллийн агентлаг, хэвлэл мэдээллийн байгууллагуудад ярилцлага өгөх хөтөлбөртэй байна.

Мөн НҮБ-ын Ерөнхий нарийн чигийн дарга Бан Ги Мун, АНУ-ын Ерөнхийлөгч асан Билл Клинтон, Катарийн Эмир, БНСУ-ын Ерөнхийлөгч Ли Мен Баг, НҮБ-ын Ерөнхий Ассамблейн 64 дүгээр чуулганы дарга А.Треки, Жорж Сорос болон “Нью Йорк Таймс” сонины нийтлэгч Томас Фрийдман нартай биечлэн уулзах бөгөөд АНУ-ын Ерөнхийлөгч Барак Обамагийн хүлээн авалтад оролцоно.