Өчигдөр “Итгэл хавдаргүй Монгол” Үндэсний сангийн тэргүүн, Тэргүүн хатагтай Х.Болормаад Японы Улсын Шизүока мужийн захирагч Х.Кавакацү тэргүүтэй төлөөлөгчид бараалхав. Уулзалтад Монголын талаас Ерөнхийлөгчийн Тамгын газрын дарга Д.Баттулга болон албаны бусад хүмүүс байлцав.
Уулзалтын эхэнд ноён Х.Кавакацү Тэргүүн хатагтай Х.Болормаад хандан халуун дотноор угтан авсанд талархал илэрхийлээд хорт хавдарын эсрэг тууштан ажиллан олон зуун хүнд амьдрал бэлэглэх буянтай ажил үйлс өрнүүлж байгаад нь баяр хүргэн цаашид ч хорт хавдарын өвчлөлтэй тэмцэхэд нь тус санг дэмжин ажиллахаа илэрхийлсэн юм.
Тэргүүн хатагтай Х.Болормаа, Ноён Х.Кавакацүтай 2010 оны Монгол Улсын Ерөнхийлөгчийн Япон Улсад хийсэн айлчлалын үеэр уулзаж Шизүока мужийн хавдар судлалын төвд зочилж байснаа дурьдаад Шизүока мужаас “Итгэл хавдаргүй Монгол” санд бэлэглэсэн биет үзүүлэн нь Монгол эмэгтэйчүүдийн хөхний хорт хавдрын эрсдлийг бууруулахад чухал ач холбогдлоо өгч байгаа гэдгийг онцлов.
Мөн уулзалтын үеэр Ерөнхийлөгчийн Тамгын газрын дарга Д.Баттулга хэлэхдээ,
2011 оны 3 дугаар сарын 11-нд болсон газар хөдлөлт, цунамийн хохирлыг японы ард түмэн богино хугацаанд даван туулж буйд баяртай байна.Япон Улс нь Монгол Улсын 1990-ээд оны өөрчлөлт шинэчилэлтийн хүнд үеүүдэд байнга тусалж хамт байсан, бид ч бас Японы ард түмнийг хүнд гамшиг тохиолдсон үед бүхий л байдлаар дэмжиж байгаа. Монгол Улсын тэргүүн хатагтай санаачилан хэрэгжүүлж буй хорт хавдрын эсрэг үйлсэд Та бүхнийг дэмжлэг үзүүлж байгаад талархаж байна. Хорт хавдрын өвчлөл нь Монгол Улсад нэн аюултайгаар заналхийлж буй эмзэг асуудал болоод байна. Цаашид ч хорт хавдрын өвчлөлийн бууруулах, эмчлэх тал дээр тус сантай хамтран ажиллана гэдэгт итгэлтэй байна. Мөн Монгол Улс нь Японы өндөр технологийн хөгжлийг банйга нэвтрүүлж байх сонирхолтой байдаг. Танай муж бол өндөр технологиороо Япондоо тэргүүлэгч байр суурьтай. Өндөр технологийг Монгол Улсад нэвтрүүлэх, нарийн мэргэжилтэн бэлтгэх тал дээр ч та бүхэнтэй хамтран ажиллана гэдэгт итгэлтэй байна гэв.
