2011 оны 8 сарын 2-нд Ерөнхийлөгчийн ахлах зөвлөх П.Цагаан Япон Улсын Ойта мужийн Жижиг, дунд үйлдвэрлэлийн зөвлөлийн тэргүүн Казутоши Икэбэ тэргүүтэй төлөөлөгчидтэй уулзаж хоёр орны худалдаа, эдийн засгийн харилцааг өргөжүүлэх талаар санал солилцлоо.
Тус улсын Ойта мужид үйл ажиллагаа явуулдаг 40 гаруй компаниас бүрддэг Японы төлөөлөгчид улзалтын эхэнд Монгол Улсын Ерөнхийлөгч Ц.Элбэгдоржийн Япон Улсад хийсэн айлчлалын ач холбогдлын талаар болон өнгөрсөн гуравдугаар сард цунамигийн учруулсан гамшгийн үеэр Монгол Улс хамгийн түрүүнд тусламжийн гараа сунгасанд талархаж явдагаа илэрхийлэв. Ерөнхийлөгчийн зөвлөх П.Цагаан ч мөн адил Монгол Улс шилжилтийн хүнд хэцүү үеийг даван туулж байх үед Япон Улс хамгийн их буцалтгүй тусламж, дэмжлэг үзүүлсэнийг Монголын ард түмэн мартдаггүй, зовох цагт нөхрийн чанар танигддаг гэдэг зүйр үг байдгийг хэлэв.
Монгол Улсын талаар ийнхүү сонирхож байгааг П.Цагаан сайшаан дэмжиж, тус улс ирэх он жилүүдэд хурдацтай хөгжих төлөвтэй байгаа. Ийм учраас манайд хөрөнгө оруулах нь цагаа олсон хэрэг гэв.
