Монгол Улсын Ерөнхийлөгч Цахиагийн Элбэгдоржийн урилгаар манай оронд айлчилж буй БНСУ-ын Ерөнхийлөгч, Эрхэмсэг ноён Ли Мен Баг, Гэргий Эрхэмсэг хатагтай Ким Юн Үг нарын Төрийн айлчлал өнөөдөр эхэлж байна. БНСУ-ын Төрийн тэргүүн болон Тэргүүн хатагтайг Монгол Улсын Ерөнхийлөгч Ц.Элбэгдорж, гэргий Эрхэмсэг хатагтай Х.Болормаа нар Сүхбаатарын талбайд угтан авав.
Угтан авах ёслолын үеэр хүндэт харуул жагсаж хоёр орны төрийн дуулал эгшиглэсэн бөгөөд Монголын талаас УИХ-ын гишүүн, Гадаад харилцааны сайд Г.Занданшатар, Монгол Улсаас БНСУ-д суугаа Онц бөгөөд бүрэн эрхт Элчин сайд Д.Гэрэл, Ерөнхийлөгчийн Тамгын газрын дарга Д.Баттулга, УИХ-ын гишүүн, Зам тээвэр барилга, хот байгуулалтын сайд Х.Баттулга, УИХ-ын гишүүн, Эрдэс баялаг, эрчим хүчний сайд Д.Зоригт, БНСУ-ын парламентын бүлгийн дарга Э.Мөнх-Очир, Нийслэлийн засаг дарга бөгөөд Улаанбаатар хотын захирагч Г.Мөнхбаяр, ҮАБЗ-ийн Нарийн бичгийн дарга Ц.Энхтүвшин, Ерөнхийлөгчийн Гадаад бодлогын зөвлөх Л.Пүрэвсүрэн, ГХЯ-ны Азийн газрын захирал Б.Ганболд тэргүүтэй төлөөлөгчид, БНСУ-ын талаас Гадаад харилцаа, худалдааны сайд Ким Сон Хван, Мэдлэгийн эдийн засгийн сайд Чой Жүн Гён, Эрүүл мэнд, нийгмийн хамгааллын сайд Жин Сү Хи, БНСУ-аас Монгол Улсад суугаа Элчин сайд Жон Ил, Ерөнхийлөгчийн Гадаад харилцаа, аюулгүй байдлын бодлогын ахлах зөвлөх Чон Ён Ү нарын болон бусад албаны хүмүүс байлцав.
Дараа нь хоёр орны Ерөнхийлөгч нар Эзэн Чингис хааны хөшөөнд хүндэтгэл үзүүлсэн бөгөөд БНСУ-ын Ерөнхийлөгч, Эрхэмсэг ноён Ли Мен Баг Төрийн ордны хүндэт зочны дэвтэрт гарын үсэг зурж дурсгалын зураг авхуулав.
Одоо хоёр орны Төрийн тэргүүд Төрийн ёслол хүндэтгэлийн өргөөнд уулзалт хийж буй бөгөөд дараа нь албан ёсны хэлэлцээ хийх юм.
