Нью-Йорк хотод ажиллаж байгаа Монгол Улсын Ерөнхийлөгчөөс ярилцлага авах хүсэлтийг дэлхийн томоохон хэвлэл мэдээллийн агентлагууд ирүүлсээр байна.
Өнөөдөр Ерөнхийлөгч Ц.Элбэгдорж, зарим хэвлэлийхний хүсэлтээр сэтгүүлчдийн асуултанд хариуллаа. “Форбс” сэтгүүлийн тоймч Мега Бахрий, “Экономист” сэтгүүлийн олон улсын сурвалжлагч Лэйн Грийн, “Нью-Йорк Пост” сонины эдийн засгийн сурвалжлагч Жон Крудл, “Барронс” сэтгүүлийн ахлах редактор Робин Голдуин Блюментал нарт тус тус ярилцлага өгч, монгол орны өнөөгийн байдлын талаар мэдээлэл өгөн, зарим асуудлаар байр сууриа илэрхийллээ.
Гадаадын хэвлэл мэдээллийн хэрэгслүүд, манай улсын уул уурхайн салбарын ирээдүй, ялангуяа нүүрсний томоохон ордууд болон ураны орд газруудын тухай, хөрөнгө оруулалтын талаар, дэлхийн цаг уурын өөрчлөлт Монголд хэрхэн нөлөөгөө үзүүлж байгаа тухай сонирхон асууж байсан.
“Ройтерс” агентлаг болон, “Нью-Йорк Таймс” сонины нийтлэлч Томас Фрийдман, “Блүүмбэрг” суваг мөн, Монгол Улсын Ерөнхийлөгчтэй уулзаж, ярилцлага авахаар хүсэлтээ өгөөд байна.
