Шүүхийн шийдвэр гүйцэтгэх байгууллагын нийт бие бүрэлдэхүүнд
Монгол Улсад Шүүхийн шийдвэр гүйцэтгэх байгууллага байгуулагдсаны 90 жилийн ойг тохиолдуулан тус байгууллагад хүч хөдөлмөр, бие сэтгэл, оюун ухаанаа зориулан ажиллаж байсан, ажиллаж байгаа үе үеийн ахмадууд, генерал, офицерууд, цэргийн нийт бие бүрэлдэхүүн Та бүхэнд чин сэтгэлийн халуун мэндчилгээг дэвшүүлье.
Монголын ард түмэнд мянганаар, зуунаар тоологдох их түүхэн ойн жилд Шүүхийн шийдвэр гүйцэтгэх байгууллага байгуулагдсаны 90 жилийн ой тохиож байгаа нь бэлгэдэлтэй юм. Шүүхийн шийдвэр гүйцэтгэх байгууллага 90 жилийн түүхэн замналыг туулахдаа төрийн өмнө хүлээсэн үүргээ нэр төртэй биелүүлэн, хууль ёсыг сахиулж, олон мянган хүнийг хүмүүжүүлэн амьдралын зөв замд хөтөлж, эх орныхоо бүтээн байгуулалтад тодорхой хувь нэмрээ оруулж ирснийг онцлон тэмдэглэж байна.
Аливаа ой нь өнгөрсөн хугацаанд хийж бүтээсэн ажлаа дүгнэж цэгнэх, цаашид хийж бүтээх ажил үйлсээ тодорхойлох агшин байдаг. Эх орондоо тангараг өргөж, мөрдөс зүүж, онцгой үүрэг гүйцэтгэдэг танай байгууллагын өмнө хийж бүтээх их ажил, сорилтууд ч хүлээж байна.
Шүүхийн шийдвэр заавал биелдэг байх нь хууль дээдлэх зарчмыг хэрэгжүүлж байгаагийн илэрхийлэл бөгөөд шүүхийн шийдвэр биелэхгүй байх нь шүүх эрх мэдлийн нэр хүндэд сөргөөр нөлөөлж, шударга ёсонд итгэх олон түмний итгэлийг сулруулах, улмаар улс орны эдийн засгийн хөгжилд ч саад тотгор учруулна. Ийм учраас шүүхийн шийдвэр гүйцэтгэх байгууллагын үйл ажиллагаа байнга төгөлдөржиж, иргэдийн зөрчигдсөн эрх, ашиг сонирхлыг хамгаалах, хууль ёсыг хэлбэрэлтгүй сахиулахад чиглэсэн төрийн бодлогын хэрэгжилт, үр нөлөө нь тус байгууллагын үйл ажиллагаанаас харагдаж, олон түмэнд мэдрэгдэж байх ёстой.
Төрийн хуулийг дээдлэн, шударга ёсыг баримталж, өндөр сахилга, ёс зүйтэй байж, шүүхийн тогтоол, шийдвэр гүйцэтгэх ажиллагааны бодит үр дүнг дээшлүүлэн, олон улсын түвшинд хүргэснээр Монгол Улсад ардчилал, хүний эрх, шударга ёсыг эрхэмлэн дээдэлсэн эрх зүйт нийгмийг байгуулахад Та бүхэн бодит хувь нэмэр оруулж чадна гэдэгт итгэж байна.
Түүхт ойн баяраа тэмдэглэж байгаа Шүүхийн шийдвэр гүйцэтгэх байгууллагын нийт бие бүрэлдэхүүн Та бүхэнд болон Та бүгдийн гэр бүл, ойр дотны бүх хүмүүст эрүүл энх, аз жаргал, хамгийн сайн сайхан бүхнийг хүсэн ерөөе.
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
2011 оны 8 дугаар сарын 24
