Монгол Улсын Ерөнхийлөгч Ц.Элбэгдорж, Мянганы Сорилтын Корпорацийн дэд Ерөнхийлөгч Дариус Мэнс болон монголын хөтөлбөрийг хариуцсан захирал Жерри Дүткэвич нар өнөөдөр Монгол Улсын Ерөнхийлөгчид бараалхлаа.
Монгол улс, МСК-ийн тусламж авах орнуудад тавигддаг бүх шаардлагуудыг тогтвортой хангаж ирсэнийг үнэлж байдгаа ноён Дариус Мэнс хэлээд, Монгол улсаас санал болгосон гурван төслийг үргэлжлүүлж, эдгээр төсөлд нийт 50 сая доллар нэмж олгохоор шийдсэнийг мэдээлэв. Төмөр замын шинэчлэлд зориулахаар төлөвлөж байсан хөрөнгийг өөр төсөлд шилжүүлж, бүрэн дүүрэн ашиглах талаар аль аль талаасаа хүчин чармайлт гаргаж ажиллаж байгаа гэдгийг тэрээр мөн хэллээ. Ноён Д.Мэнсийн хэлснээр, манай талаас санал болгосон төслүүдийг нарийвчлан судалж байгаа, ирэх 12-р сард болох Мянганы Сорилтын Корпорацийн удирдах зөвлөлийн хурлаар шийдвэрлэхээр ажиллаж байна.
Ерөнхийлөгч Ц.Элбэгдорж хариу талархал илэрхийлээд, монголын талаас шинээр санал болгоод байгаа гурван төслийг МСК анхааралтай судалж энэхүү чухал төслүүдийг санхүүжүүлнэ гэдэгт итгэлтэй байгаагаа илэрхийллээ. Мянганы Сорилтын Корпорациас санхүүжүүлэх төсөл амжилттай хэрэгжих нь манай орны хувьд төдийгүй, Монгол Америк орнуудын харилцаа хамтын ажиллагаанд чухал ач холбогдолтой үйл явдал болох юм гэдгийг дурдсан юм.
