Монгол Улсын үндэсний статистикийн байгууллагын 85 жилийн ойн баярын өдөр энэ салбарын нийт ажилтнууд, үе үеийн ахмадууд, статистикчид Та бүхэнд чин сэтгэлийн халуун мэндчилгээ дэвшүүлье.
Монгол Улсын анхдугаар Үндсэн хуульд “Улсын аливаа тоо бүртгэх явдлыг тогтоох”-ыг хуульчлан заасны дагуу 1924 оны 11 дүгээр сарын 11-ний өдөр тэр үеийн Дотоод яамны бүтцэд тоо бүртгэлийн хэлтсийг анх байгуулснаар статистикийн байгууллагын үндэс суурь тавигдаж, өдгөө олон улсын жишигт нийцсэн арга зүй зарчимд суурилсан, хараат бус бие даасан байдлаар үйл ажиллагаагаа явуулдаг, шинжлэх ухааны үндэслэлтэй тоо мэдээллээр иргэд, аж ахуйн нэгж, төрийн болон төрийн бус байгууллагуудад адил тэгш үйлчилдэг үндэсний хэмжээний томоохон салбар болон хөгжөөд байна.
Өнгөрүүлсэн 85 жилийнхээ түүхэн хугацаанд Монгол Улсад статистикийн мэдээллийн бүхэл бүтэн тогтолцоог бий болгож, улс орны нийгэм, эдийн засгийн хөгжлийг тооны хэлээр тодорхойлон цаг үеийн шаардлагыг хангасан мэдээллийг цуглуулах, боловсруулах, сан байгуулах, судалгаа шинжилгээ хийж дүгнэлт гаргах, хэрэглэгчдэд хүртээмжтэй байх нөхцлийг бүрдүүлэх, мэргэшлийн зөвлөгөө өгөх, үйлчилгээ үзүүлэх зэрэг үндсэн үүргээ статистикийн байгууллага амжилттай хэрэгжүүлж ирснийг тэмдэглэхэд таатай байна.
Та бүхэн өмнөх он жилүүдэд олсон амжилт, ололтоо бататгаж, улмаар статистикийн байгууллагын үйл ажиллагааны шинэчлэл, өөрчлөлтийг олон улсын стандартад нийцүүлэх, дэвшилтэт арга, техник, технологийг нэвтрүүлэх, үндэсний стандартыг бий болгох, боловсон хүчний чадавхиа бэхжүүлэн, статистикийн байгууллагын олон талт хамтын ажиллагааг өргөжүүлэх, тус салбарын хамгийн чухал бүтээгдэхүүн болох мэдээ, мэдээллийн үнэн зөв, бодит байдалд чиглэсэн үйл ажиллагааг эрчимжүүлэн ажиллана гэдэгт эргэлзэхгүй байна.
Улс орны хөгжлийн түлхүүр болсон статистикийн байгууллагатай ажил, амьдралын зам мөрөө холбосон Та бүхний амьдрал тань аз жаргалаар дүүрэн байж албан ёсны статистикийг хөгжүүлэх ажил үйлс бүхэн тань өргөжин хөгжихийн ерөөл дэвшүүлье.
МОНГОЛ УЛСЫН ЕРӨНХИЙЛӨГЧ Ц.ЭЛБЭГДОРЖ
