Монгол Улсын Ерөнхийлөгч Ц.Элбэгдорж өнөөдөр Монгол Улсаас БНХАУ-д суухаар томилогдсон Онц бөгөөд Бүрэн эрхт Элчин сайд Ц.Сүхбаатарт итгэмжлэх жуух бичиг гардууллаа.
Хэдийгээр Монгол Хятадын харилцаа хангалттай өндөр түвшинд байгаа ч, хоёр орны харилцааг шинэ шатанд гаргах боломжийг судлах нь чухал гэдгийг Ерөнхийлөгч зөвлөмжийнхөө үеэр онцоллоо. Эдийн засаг, худалдааны салбарт шийдвэр нь хүлээгдэж байгаа зарим асуудал, тухайлбал, мах болон малын гаралтай бүтээгдэхүүн экспортлох сонирхол их байгааг харгалзан энэ чиглэлээр анхааран ажиллах хэрэгтэй гэж зөвлөсөн.
ӨМӨЗО нь Монгол, Хятадын харилцааны гүүр болж, хоёр орны худалдааны 80 гаруй хувь нь тус оронтой хийгдэж байгаа тул энэ чиглэл Элчин сайдын анхаарлын төвд байх ёстой гэдгийг дурдлаа.
Өнөөдөр БНХАУ-д олон тооны монголчууд сурч, ажиллаж байгаа. Зөвхөн суралцагчдын тоо 3000 гаруй байгаа бөгөөд иргэдтэйгээ байнга уулзаж, эрхзүйн дэмжлэг үзүүлэн, суугаа орны хууль эрхзүйг танилцуулах ажил байнга зохион байгуулах нь чухал хэмээн Ерөнхийлөгч зөвлөлөө.
Ц.Сүхбаатар нь ГХЯ-нд олон жил ажилласан, өмнө нь Элчин сайдаар ажиллаж байсан туршлагатай мэргэжлийн дипломатч юм.
