Монгол Улсын Ерөнхийлөгч Ц.Элбэгдорж зарлиг гарган газар тариалангийн салбарт олон жил үр бүтээлтэй ажиллаж, бүс нутгийн газар тариалангийн хөгжилд үнэтэй хувь нэмэр оруулсан зарим тариаланчдыг төрийн дээд одон медалиар шагналаа.
1972 оноос эхлэн газар тариалангийн салбарт тасралтгүй ажиллаж байгаа, улсын ургацын 3 удаагийн аварга Төв аймгийн Угтаалцайдам сумын “Элсэн цагаан” ХХК-ийн комбайнч Р.Төмөрбаатарт Монгол Улсын гавъат механикжуулагч цол хүртээлээ., Тариан талбай дээрээ шинэхэн цол тэмдэгээ гардаж авсан Р.Төмөрбаатар, илгээлт өвөртлөн атар газар эзэмшихээр Угтаалд ирж байснаас хойш атар газартаа үнэнч байсан тухайгаа Ерөнхийлөгчид хуучиллаа. “Тариагаа хураагаад комбайндаа явж байхдаа Төрийн тэргүүнээсээ хүндтэй шагнал хүртсэндээ баяртай байна. Энэ их хүндэтгэлийг манай хамт олон бас хүлээж авах учиртай. Бид эх орныхоо хүнсний хэрэгцээг хангах чухал зорилтыг хэрэгжүүлэхийн төлөө улам шамдан ажиллах болно” гэлээ.
Ерөнхийлөгчийн зарлигаар, “Өнөрбулагтай” ХХК-ийн захирал Б.Энэбиш, “Зүүвч ивэн бургалтай” ХХК-ийн трактор-комбайнч А.Алдар, “Мөнх шижир тариа” ХХК-ийн трактор-комбайнч Д.Нэргүй нарыг Хөдөлмөрийн гавъяаны улаан тугийн одонгоор, Тариалан эрхлэлтийг дэмжих сангийн мэргэжилтэн, мастер Ж.Нямсүрэн, “Өрнөлт-Сэлэнгэ”ХХК-ийн трактор-комбайнч Д.Баянхишиг нарын таван хүнийг Алтан гадас одонгоор, мөн “Газрын ундраа” ХХК-ийн трактор-комбайнч Ш.Жанцан, “Цэгээн хуст” ХХК-ийн трактор-комбайнч Б.Эрдэнэбат нарын таван хүнийг хөдөлмөрийн хүндэт медалиар тус тус шагналаа.
Эдгээр гавъяатнууд тариан талбай дээрээ, трактор комбайныхаа хажууд шагналаа гардаж авсан юм. Монгол Улсын Ерөнхийлөгч Ц.Элбэгдорж хэлэхдээ “Манай улсын нийт тариаланчид цаг наргүй, хөлс хүчээ шавхан ажиллаж байгааг бид харж ойлгож байгаа. Газар тариаланг сэргээж, хүн амыг чанартай дотоодын хүнсээр хангах том зорилтыг хэрэгжүүлэхэд та бүхний оруулж байгаа хувь нэмрийг Төр засаг үнэлж байна. Атар газар эзэмшсэний 50 жилийн ойн баярын мэндийг нийт тариаланчиддаа хүргэе” гэлээ.
