Монгол Улсын Ерөнхийлөгч Цахиагийн Элбэгдорж Бүгд Найрамдах Киргиз улсад албан ёсоор айлчлахаар тус улсын нийслэл Бишкек хотын “Манас” олон улсын нисэх буудалд газардлаа. Монгол Улсын Ерөнхийлөгч Цахиагийн Элбэгдорж болон түүнийг дагалдан яваа албан ёсны төлөөлөгчид болох Гадаад хэргийн сайд Г.Занданшатар, ХХААХҮЯ-ны сайд Т.Бадамжунай, УИХ-ын гишүүн П.Алтангэрэл, Г.Баярсайхан нарын болон бусад төлөөлөгчдийг Бүгд Найрамдах Киргиз Улсын Ерөнхий сайдын орлогч Д.Оторбаев, тус улсын Гадаад хэргийн дэд сайд Н.Айтмурзаев нарын тэргүүтэй албаны хүмүүс тосон авав.
Дараа нь хүндэт харуул жагссан “Конгресс холл” ордны өмнө БНКиргиз Улсын Ерөнхийлөгч Алмазбек Шаршенович Атамбаев Монгол Улсын Ерөнхийлөгч Цахиагийн Элбэгдоржийг албан ёсоор угтан авч хоёр улсын төрийн дуулал эгшиглэв.
Угтах ёслолын дараа хоёр улсын төрийн тэргүүд Конгресс холл ордны “Аксакалов” танхимд ганцаарчилсан уулзалт хийлээ. Уулзалтын эхэнд Киргиз Улсын Ерөнхийлөгч Алмазбек Атанбаев Монгол Улсын Ерөнхийлөгчийг эх орондоо тавтай морилохыг уриад “Манай эриний 842 онд “Киргизийн хаант улс” бий болж байсан. Энэ жил 1170 жилийнх нь ой тохиож байна. Их Чингис хаан бас аугаа их гүрнийг байгуулж байсан. Энэ түүхийн ул мөр одоо хүртэл байдаг бөгөөд Киргизэд “Монгол дор” хэмээх үе залгаж ирсэн монгол үндэстэн бий. Энэ улбаанаас бид ахан дүүсийн барилдлагатай “садан төрөл” улсууд юм гэж хэлж болно. Бид эрт цагт том жижиг хаант улс байгаад одоо аль аль нь жижиг улс болсноороо ижил төстэй хувь заяатай улсууд. Манай хоёр улсын хэлэнд маш олон үг ижил дуудлагатай байдаг нь тун өвөрмөц тохиол юм” гэлээ.
Монгол Улсын Ерөнхийлөгч Ц.Элбэгдорж эртнээс харилцаатай Киргиз Улсад тус улсын ерөнхийлөгчийн урилгаар зочлон ирээд байгаадаа баяртай байгаагаа илэрхийлээд “Монгол Киргиз хоёр орны ард түмэн түүх соёлын хувьд эртний уламжлалтай. Монгол Улсад “Хяргас” нуур “Хэргэсүүр” гээд Киргизтэй холбоотой байгаль түүхийн дурсгал олон байдаг бөгөөд аль аль нь нүүдэлчин угсаатай ард түмэн. Дөрөвдүгээр сарын 22-нд хоёр улсын хооронд дипломат харилцаа тогтоосны 20 жилийн ой тохиох гэж байна. Энэ ойн өмнө айлчлал хийж байгаа нь билэг дэмбэрэлтэй юм. Манай хоёр орны эдийн засгийн харилцааг хөгжүүлэхэд засгийн газар хоорондын комиссуудын үйл ажиллагаа чухал. Тиймээс энэ оны сүүлийн хагаст засгийн газар хоорондын комиссын хуралдааныг Монгол Улсад хийх саналтай байгаа” гэв.
БНКиргиз Улсын Ерөнхийлөгч А.Атамбаев “Манай хоёр ард түмэн нүүдэлчин угсаатай ч аль аль нь парламентын засаглалыг сонголоо. Парламентын засаглалд давуу тал их бий гэдэг нь тодорхой. Танай орон Ерөнхийлөгчөө парламентаас бус ард түмнээсээ сонгодог, үүний давуу тал юу вэ? парламентаасаа сонгох нь зардал хэмнэх зэрэг давуу талтай байж болох талаар та бүхэн судалсан уу” хэмээн асуухад Ерөнхийлөгч Ц.Элбэгдорж “Манайх ерөнхийлөгчөө бүх ард түмнээсээ сонгодог бөгөөд энэ бол ерөнхийлөгч нь ард түмэн дундаа, ойр байхад нь дөхөмтэй учир бид илүүд үздэг” хэмээн хариулав.
Дараа нь хоёр улсын төрийн тэргүүн Улаанбаатар-Бишкек- Станбулын нислэг нээж улмаар иргэд хоорондын харилцааг хөгжүүлэх боломжийн тухай, хөдөө аж ахуйн салбар тэр дундаа монголоос киргизэд мах экспортлох боломжийн тухай, шинэ тулгар ардчиллыг хөгжүүлж буй орнуудад тулгардаг сорилын талаар санал солилцсоноор ганцаарчилсан уулзалт өндөрлөсөн юм.
Мэдээний том зургуудийг энд дарж татаж авна уу
http://www.president.mn/2012-04-03kirgiz1.zip
http://www.president.mn/2012-04-03kirgiz2.zip
