“Эх дэлхийн 7 тэрбум хүний өмнөөс хамгийн зөв шийдвэрийг гаргаж, манлайлж, бусаддаа үлгэрлэсэн Та бүхнээр бид бахархаж байна” хэмээн НҮБ-ын Хүрээлэн буй орчны хөтөлбөрийн захирал ноён А.Штайнер “Эх дэлхийн манлайлагчид”-ыг зарлах хэвлэлийн бага хурлын эхэнд хэллээ.
Бразил Улсын Рио де Жанейро хотноо болсон, НҮБ-ын Хүрээлэн буй орчны хөтөлбөрөөс зарладаг “Эх дэлхийн манлайлагчид”-ын 2012 оны эзнийг зарлах хэвлэлийн бага хуралд энэ жилийн шагналын эзэд хүрэлцэн ирсэн байв.
“Бодлогын манлайлагч” төрөлд Монгол Улсын Ерөнхийлөгч Цахиагийн Элбэгдорж, “Бизнесийн манлайлагч” төрөлд Бразилийн банкны захирал Фабио Барбоса, Арабын Нэгдсэн Эмират Улсын Султан Ахмед Аль Жабер , “Үйл хэргийн манлайлагч” төрөлд Швейцарийн зохион бүтээгч Бертран Пикард, “Шинжлэх ухааны манлайлагч” төрөлд Недерландын эрдэмтэн Сандер Ван дер Лиюв, “Олон нийтийг манлайлагч” төрөлд Кенийн Маасай омгийн Самсон Парашина нар тус тус энэхүү шагналыг хүртлээ.
Хэвлэлийн бага хуралд Бразилийн болон олон улсын 20 гаруй хэвлэл мэдээллийн хэрэгсэл ирж сурвалжилсан юм.
Олон улсын сэтгүүлчид энэхүү хэвлэлийн бага хурлын дараа Монгол Улсын Ерөнхийлөгчийн тухай “Ногоон Ерөнхийлөгч” хэмээн бичиж байв.
Мөн энэ өдөр “ Эх дэлхийн манлайлагчид”-д шагнал гардуулах ёслолын ажиллагаа болсон юм. Рио де Жанейро хотын хамгийн том зочид буудал болох Копокабане \Copacabane\-д болсон ёслолын ажиллагаанд хүрэлцэн ирсэн 300 гаруй зочдын дунд дэлхийд алдартай шийдвэр гаргагчид, шинжлэх ухаан, соёл урлагийн салбарын алдартнууд хүрэлцэн ирсэн байлаа.
Шагнал гардуулах хүндэтгэлийн ёслолын ажиллагаа 3 цаг орчим үргэлжилж, эх дэлхийн ногоон ирээдүйн төлөө гарамгай үйлс гаргаж буй алдартнууддаа хүндэтгэл үзүүлэв.
Мэдээний том зураг, дүрснийг дор дарж татаж авна уу
http://share.gogo.mn/SoENplUjfM95621338944861/photos2012-06-04.rar
