Монгол Улсын Ерөнхийлөгч Ц.Элбэгдоржид НҮБ-ын байгаль орчны хөтөлбөрийн “Эх дэлхийн манлайлагч” шагнал хүртсэнтэй нь холбогдуулан НҮБ-ын суурин төлөөлөгч Сезин Синаноглу албан бичиг илгээн баяр хүргэв.
Уг албан бичигт “Байгаль орчныг хамгаалах талаарх улстөрийн манлайлал, амжилтаараа НҮБ-ын байгаль орчны хөтөлбөрийн “Эх дэлхийн манлайлагч-2012” шагнал хүртсэнд Монгол дахь НҮБ-ын төлөөлөгчийн газрын хамт олны өмнөөс болон хувиасаа танд баяр хүргэж байгаадаа нэн таатай байна.
Энэ бол эрхэмсэг ноён Ерөнхийлөгч танд үндэсний болон олон улсын хэмжээнд олон чухал санал санаачилга дэвшүүлсний тань төлөө болон тогтвортой хөгжилд чиглэсэн улс төрийн үлгэр жишээ манлайллын тань төлөө олгож буй зүй ёсны талархлын шагнал юм. Эдийн засгийн өндөр өсөлт, байгаль орчноо хамгаалах хоёрын тэнцвэрт байдлыг бэхжүүлэхэд таны үзүүлж буй тууштай манлайлалд Монгол дахь НҮБ-ын төлөөлөгчийн газар талархахын сацуу таныг болон бүх монголчуудыг зорилгодоо хүрэхэд үнэнчээр дэмжих болно.
Эрхэмсэг ноён та бидний гүн хүндэтгэлийг хүлээн авна уу” хэмээжээ.
