Агаарын бохирдлыг бууруулах үндэсний хороо, Уул уурхайн яам, Зам тээврийн яам, Нийслэлийн Засаг даргын Тамгын газар хамтран “Авто тээврийн хэрэгсэл, шатахуунаас үүдэлтэй бохирдлыг бууруулах боломж” сэдэвт нээлттэй хэлэлцүүлгийг өнөөдөр Иргэний танхимд зохион байгууллаа.
Монгол Улсын Ерөнхийлөгчийн Тамгын газрын дарга, Агаарын бохирдлыг бууруулах үндэсний хорооны дарга П.Цагаан хэлэлцүүлгийг нээж хэлсэн үгэндээ “Энд хуран цугларсан та бүгдийн амар амгаланг айлтгая. Агаарын бохирдлын асуудлыг аль ч улиралд мартаж болохгүй гэдгийг Ерөнхийлөгч маань хэлснийг би үргэлж санаж явдаг. Урин дулаан цагт агаарын бохирдлын асуудлыг хөндөж ярилаа гээд зарим хүн гайхаж магадгүй. Харин энд хуран цугларсан хүмүүс энэ учрыг ойлгох хүмүүс гэж ойлгож байна.
Нийслэлийн агаарын бохирдол гамшгийн хэмжээнд хүрчихсэн байхад бид бүхний хүчин чармайлтын үр дүнд тодорхой ахиц дэвшил гарсан. Хэд хэдэн удаагийн судалгаа шинжилгээний дүнд агаарын бохирдлын зарим үзүүлэлт сүүлийн хоёр жилийн хугацаанд 10-30 хувиар буурсныг харж болно.
Сүүлийн хоёр жилийн хугацаанд түлштэй холбоотой асуудлаас гадна, хотын 156 мянган өрхөд нам даралтын зуух олгох зэрэг бодит ажлуудыг хийсэн. Мөн дэд бүтэцтэй холбоотой олон ажлууд бий. Харин өнөөдрийн хэлэлцэх гол сэдэв бол автомашины утааны асуудал.
Нийслэлийн хэмжээнд хоёр жилийн өмнө 200 мянга гаруй автомашин байсан бол өнөөдөр 300 мянган хүрээд байна. Үүнийг дагаад нийслэлийн агаарын бохирдол тодорхой хэмжээгээр өссөөр байна. Автомашины утаа нь агаарын бохирдлыг нэмэгдүүлэх гол хүчин зүйлүүдийн нэг учраас энэ асуудалд анхаарахаас аргагүй. Нийт агаарын бохирдолд автомашины утааны эзлэх хувь нь 20-30 хувь гэсэн судалгаа бий. Ингээд автомашины утааг хэрхэн бууруулах арга зам, эрх зүйн зохицуулалт, арга технологийн талаарх хэлэлцүүлэгтээ оръё” хэмээв.
Дараа нь Уул уурхайн яамны Төрийн нарийн бичгийн дарга Р.Жигжид “Шатахууны чанарыг сайжруулах, чанарт тавих хяналт, импортоор оруулж ирж буй түлшний чанарыг сайжруулах эрх зүйн орчныг бүрдүүлэх. Хийн түлшний хэрэглээний өнөөгийн байдал, цаашид нэмэгдүүлэх боломж” сэдвээр илтгэл тавьлаа. Тэрбээр илтгэлдээ Монголын шатахууны хэрэглээ, чанар болон байгалийн хийн хэрэглээний сүүлийн үеийн нөхцөл байдлын талаар танилцуулав. Тэрбээр илтгэлдээ байгалийн хийн шатахуун түгээх станцуудын тоог нэмэгдүүлэх, эрх зүйн орчинг боловсронгуй болгох ажлыг эрчимжүүлэх, хот орон нутгийн шатахууны чанарын лабораториудын боловсон хүчний тоог нэмэгдүүлж, шинээр сургах, шингэрүүлсэн шатдаг хийн савны стандартыг тогтоох лаборатори зэргийг байгуулах гэх мэт саналыг тавьлаа.
Дараа нь Зам тээврийн яамны Техник технологи, мэргэжлийн хэлтсийн дарга Баттулга “Зам тээврийн яамнаас агаарын бохирдлыг бууруулах чиглэлээр хэрэгжүүлж байгаа ажлын явц, гарсан үр дүн, цаашид хийхээр төлөвлөж буй арга хэмжээ” сэдвээр илтгэл тавьж, хууль эрх зүйн орчныг боловсронгуй болгох, цаашид нэмэлт өөрчлөлт хийх болон шинээр боловсруулан батлах шаардлагатай хууль, журам, стандартуудын талаар ярилаа.
Мөн Монголын газрын тосны инженерүүдийн нийгэмлэгийн гүйцэтгэх захирал, профессор Н.Цэвээнжав “Шатахууны чанарыг сайжруулахад олон улсын шинэ техник технологийг нэвтрүүлэх судалгаа, эрдэм шинжилгээ, туршилтын ажлын талаар танилцуулга, хэрэгжүүлэх зөвлөмж” сэдвээр, Нийслэлийн Засаг даргын орлогч Т.Бат-Эрдэнэ “Автомашинаас ялгарах бохирдлыг бууруулах зориулалттай тоног төхөөрөмж, бүтээгдэхүүнийг турших, үр дүнг тодорхойлох” сэдвээр, “Жим вейл” ХХК-ний үүсгэн байгуулагч Хишигжаргал “Авто тээврийн хэрэгслийн бохирдлыг бууруулах бүтээгдэхүүн түүний үр дүн”, доктор, профессор Ц.Цэвэгжав “Авто тээврийн хэрэгслээс ялгарах хортой бодисын хэмжээг бууруулах чиглэлээр хийгдэж байгаа судалгааны дүн, цаашид тавигдах зорилго, зөвлөмж” сэдвээр, Байгаль орчин, ногоон хөгжлийн яамны Газрын дарга Д.Энхбат “Авто тээврийн хэрэгслээс ялгарах бохирдлыг бууруулах, ногоон хөгжлийг дэмжих бодлого, хүлэмжийн хийг бууруулахад иргэн, аж ахуйн нэгж, байгууллагын оролцоо, урамшууллын механизм” сэдвээр тус тус илтгэл тавьж, санал асуулгаар хэлэлцүүлэг өндөрлөсөн юм.
