Монгол Улсын Ерөнхийлөгч Ц.Элбэгдорж Бүгд найрамдах Турк улсын Элчин сайдыг хүлээн авч уулзав
Монгол Улсын Ерөнхийлөгч Ц.Элбэгдорж өнөөдөр Бүгд найрамдах Турк улсаас Монгол Улсад суугаа Онц бөгөөд Бүрэн эрхт Элчин сайд Мустафа Сарнычийг эх орондоо бүрмөсөн буцаж байгаатай нь холбогдуулан хүлээн авч уулзав. Элчин сайд Мустафа Сарныч уулзалтын үеэр “Монгол Улсад Элчин сайдаар сууж үүргээ гүйцэтгэж байх хугацаанд Ерөнхийлөгч таны зүгээс томоохон дэмжлэг туслалцаа авч байсандаа баяртай байна. Мөн ГХЯ, Монгол Улсын төрийн бүх түвшний байгууллага, Монгол Улсын ард иргэдээс бүх талын дэмжлэг авч ажиллаж ирлээ. Намайг Элчин сайдаар ажиллаж байх хугацаанд хоёр орны харилцаанд томоохон дэвшил гарсан гэж итгэж байна” гээд өнгөрсөн хугацанд хийсэн ажлуудаасаа дурдлаа.
Тэрээр “Туркийн хөрөнгө оруулагчдыг Монгол Улсын зүгт олноор татах чиглэлд чармайлт тавилаа. Туркийн Ерөнхий сайд Р.Т.Эрдоаны Монгол Улсад хийсэн айлчлал, УИХ-ын дарга З.Энхболдын Турк улсад хийсэн айлчлал амжилттай болсон. Хоёр улсын иргэд харилцан визгүй зорчих хамтын ажиллагааны гэрээнд гарын үсэг зурсан. “Туркиш эйрлайнс” компанийн Монгол руу хийж байгаа нислэгүүд амжилттай үргэлжилсээр байна. Бүгд найрамдах Турк улсын “Эксим” банкнаас Монгол Улсад орон сууцны барилга барих ажилд зориулан 300 сая ам.долларын хөнгөлөлттэй зээл олгох нь тодорхой болоод байна. Энэ ажил ойрын хугацаанд үр дүнгээ өгч эхэлнэ гэдэгт итгэлтэй байна.
Монгол Улс, Турк улс нь НҮБ-ын Аюулгүйн зөвлөл дээр харилцан бие биеэ дэмжих томоохон шийдвэр гаргасан. Монгол Улс Европын аюулгүй байдал, хамтын ажиллагааны нийгэмлэгийн гишүүн болоход Турк улс дэмжлэг үзүүлсэн” гэлээ.Турк улс 2020 оны дэлхийн Экспо үзэсгэлэн зохион байгуулах сонгуульд Измир хотын нэрийг дэвшүүлээд байгаа юм байна.
Улаанбаатар хотод Туркийн ЭСЯ, Элчин сайдын өргөөний хоёр барилгыг барих ажилд Монгол Улсаас үзүүлсэн дэмжлэгт Элчин сайд талархал илэрхийллээ.
Монгол Улсын Ерөнхийлөгч Ц.Элбэгдорж Элчин сайдаар ажиллах богино хугацаандааих ажил хийж амжуулсанд нь Элчин сайд Мустафа Сарнычид талархал илэрхийлээд цаашдын ажилд нь амжилт хүсэн ерөөв.
Монгол Улсын Ерөнхийлөгч Ц.Элбэгдорж Бүгд найрамдах Турк улсын Элчин сайдыг хүлээн авч уулзав
