Монгол Улсын Ерөнхийлөгч Монгол бахархлын өдөрт зориулсан бөхийн барилдааныг нээж үг хэллээ
Тулгар төрийн 2222 жил, Чингис Хаан мэндэлсний 851 жил - Монгол бахархлын өдөрт зориулсан өндөр чансаатай 128 бөхийн барилдаан өнөөдөр боллоо. Бөхийн өргөөнд болсон барилдааныг нээж Монгол Улсын Ерөнхийлөгч Цахиагийн Элбэгдорж хэлсэн үгэндээ “Эрхэм хүндэт монгол ахан дүү нар аа. Монголын уламжлал соёлыг шүтэн бишрэгч, үндэснийхээ бөхийг сонирхогч ард иргэд ээ.
Өнөөдөр бидний хаан шүтээн болсон Эзэн Чингис хааны мэндэлсэн өдөр. Монголчууд монгол уламжлал, монгол түүхээрээ бахархаж байгаа ийм сайхан өдөр. Өнөөдөр Чингис хааны минь өдөр. Өнөөдөр монголчуудын Бахархлын өдөр.
Өвөг дээдэс минь биднийг харж байгаа. Монголын хойч үеийнхэн өвөг дээдсийнхээ алдар цуугаар бахархаж, тэднийхээ алдар цууг хэрхэн хүндэтгэн тэмдэглэж буйг харж байгаа. Өнөөдөр бид наадам наадмын дээд болсон монгол бөхөө барилдуулж, нийт ард түмнээрээ баярлаж байна.
Ингээд энэ ойд зориулсан монгол бөхийн барилдааныг нээж байна. Энэ жил Монголын тулгар төрийн 2222 жил, эзэн Чингис хааны мэндэлсний 851 жил, Монгол Бахархлын өдөр тохиож байгаа юм. Ингээд нийт ард иргэддээ магнай тэнүүн, золбоо хийморь өрнүүн сайхан баярлахыг хүсэн ерөөе” хэмээв.
Барилдаанд Улсын Заан Ч.Санжаадамба түрүүлж, Улсын Аварга С.Мөнхбат үзүүрлэлээ.
Монгол Улсын Ерөнхийлөгч Монгол бахархлын өдөрт зориулсан бөхийн барилдааныг нээж үг хэллээ
