Монгол Улсын Ерөнхийлөгч Ц.Элбэгдорж энэ 1 дүгээр сарын 13-ны өдөр болсон Давосын дэлхийн эдийн засгийн чуулга уулзалтын хүрээнд ажиллаж буй Дэлхийн уур амьсгалын зөвлөлийн интернет хуралдаанд оролцов.
Хуралдааны үеэр Ерөнхийлөгч Ц.Элбэгдорж уур амьсгалын өөрчлөлт Монгол Улсад нөлөөлж буй байдлын талаар танилцуулж, Копенгагений хурлын үр дүн, сургамжийн талаар сэтгэгдлээ ярьж, уур амьсгалын асуудлаархи яриа хэлэлцээг цаашид тодорхой үр дүнд хүргэх асуудлаар санал бодлоо солилцлоо.
2009 оны 11 дүгээр сард Дувайд болсон Дэлхийн уур амьсгалын зөвлөлийн хурлаас уур амьсгалын өөрчлөлтийн талаар авч хэрэгжүүлэх талаар гаргасан яаралтай хэрэгжүүлэх ажлын тухай санаачилга, тухайлбал мод тарих ажлыг дэмжих олон улсын сан байгуулах, байгаль орчинд хоргүй технологийг буурай хөгжилтэй улсуудад нэвтрүүлэхийг дэмжих санхүүгийн механизмыг яаралтай бий болгох зэрэг санаачилгыг гаргаад буй ажээ.
21 дүгээр зуунд хүн төрөлхтөний өмнө тулгараад байгаа хамгийн тулгамдсан, нийтлэг сорилт болох уур амьсгалын өөрчлөлтийн асуудлаар дэлхий нийтийн тохиролцоонд хүрэхийн тулд дэлхийн улс орнууд, тэдгээрийн удирдагч нар хамтын ажиллагаанд шинээр хандаж, өөрөөр сэтгэх хэрэгтэй болсныг хуралдаанд оролцогчид онцолж байв. Уур амьсгалын өөрчлөлтийн талаар авч хэрэгжүүлэх арга хэмжээг эхний ээлжинд бүс нутгийн хэмжээнд тохиролцох замаар урагшлуулах боломжийн талаар ярилцсан бөгөөд Монгол Улс нь энэ чиглэлээр Төв болон Зүүн Азийн чиглэлд тэргүүлэх үүрэг гүйцэтгэх боломжтойг хуралдаанд оролцогчид санал нэгтэй дэмжив.
Дэлхийн уур амьсгалын зөвлөлд уур амьсгал, байгаль орчны чиглэлээр олон улсын тавцанд тэргүүлэх үйл ажиллагаа явуулж буй дэлхийн нэртэй улс төрчдөөс гадна Харвард, Стэнфорд, Кэмбриджийн их сургууль болон Япон, Энэтхэг, Бразилийн судалгааны хүрээлэнгийн нэртэй эрдэмтэд оролцож байна. Энэ удаагийн интернет бага хуралд мөн Бритиш Петролиум, Дойче банк, Дюк энержи корпораци, Токио электрик пауэр компани (Тепко) зэрэг эрчим хүч, банк, санхүүгийн салбарын дэлхийн томоохон компаниудын удирдлага, мөн Грийнпийс, Дэлхийн байгаль хамгаалах сан (WWF) зэрэг төрийн бус байгууллагын удирдлага оролцлоо.
Интернет бага хурлыг WELCOM хэмээх интернет харилцааны хамгийн сүүлийн үеийн технологийн ашиглан явуулсан бөгөөд энэ 1 дүгээр сарын сүүлчээр Швейцарийн Давос хотноо болох Дэлхийн эдийн засгийн 40 дүгээр чуулга уулзалтын үеэр Дэлхийн уур амьсгалын зөвлөлийн хуралд Ерөнхийлөгч Ц.Элбэгдоржийг оролцохыг мөн урилаа.
