Монгол Улсын Ерөнхийлөгчийн Тамгын газар, Швейцарийн хөгжлийн агентлагтай хамтран нутгийн удирдлагын түвшинд иргэдийн оролцоотойгоор шийдвэр гаргах үйл явцыг сайжруулахад дэмжлэг болох, хөтлөх урлагийг хөгжүүлэх зорилготойгоор үндэсний хэмжээний эрчимжүүлсэн цогц сургалтыг АНУ-ын Азийн сангийн хэрэгжүүлж буй “Нутгийн удирдлагын түвшинд иргэдийн оролцоог дэмжих” төслийн хүрээнд Швейцарийн Агридиа байгууллагын зөвлөх Эрист Боллигерээр удирдуулан 2014 оны дөрөвдүгээр сарын 4-18-ны өдрүүдэд зохион байгууллаа.
Энэхүү төсөл нь Монгол Улсын Ерөнхийлөгчийн Тамгын газар, Улсын Их Хурлын Тамгын газар, Засгийн газрын Хэрэг эрхлэх газрын оролцоотойгоор Монгол Улсад төвлөрлийг сааруулах үйл явцыг дэмжих зорилгоор Швейцарь улсын санхүүжилттэй хэрэгжиж байгаа засаглалыг дэмжих, төвлөрлийг сааруулах хөтөлбөрийн нэг бүрэлдэхүүн хэсэг юм. Монгол Улсын 17 сум, хороонд хэрэгжиж буй нутгийн удирдлагын түвшинд иргэдийн оролцоог дэмжих энэхүү төслийн нэг зорилго нь хөтлөх урлагийн арга, аргачлалыг нэвтрүүлж улмаар холбогдох байгууллагууд хөтлөх урлагийг идэвхтэй хэрэглэдэг болгоход оршиж байгаа юм.
Сургалт нь хоёр хэсэгтэй явсан бөгөөд эхний хэсэгт ахисан түвшний хөтлөх ур чадварыг, хоёр дахь хэсэгт ахисан түвшний сургалтаар бэлтгэгдсэн мастер сургагч багш нар төслийн гол оролцогч талуудын төлөөллийг хөтлөгчийн ур чадварт бэлтгэх сургалтыг удирдан зохион байгуулсан. Сургалтаар бэлтгэгдсэн эдгээр оролцогчид цаашид иргэний танхимын аливаа хэлэлцүүлэг, олон нийтийн бусад хурлыг үр дүнтэй хөтлөн чиглүүлэх үүрэгтэй.
Цаашид сургалтад оролцсон байгууллагууд нэгдэж консерциум байгуулан хөтлөх урлагийн чиглэлээр сургагч багш бэлтгэх сургалтуудыг төлбөртэйгээр зохион байгуулах болно. Ингэснээр нийслэл болон орон нутагт олон нийт, иргэдийн уулзалт хэлэлцүүлгүүдийг үр дүнтэй удирдан явуулах байдал нэмэгдэх бөгөөд ард иргэдийн санаа бодлыг тусган авснаараа орон нутгийн түвшинд шийдвэр гаргах явцыг сайжруулж, оролцоог нэмэгдүүлэх боломж бүрдэнэ.
