Хоёрдугаар сарын 28-ны өдөр Монгол Улсын Ерөнхийлөгч Говь-Алтай аймгийн Алтай хот, Дарив сум, Ховд аймгийн Зэрэг сумдад тус тус ажиллалаа.
Говь-Алтай аймгийн ИТХ-ын дарга Ш.Эрдэнэбат, Засаг дарга Г.Бямбажав тэргүүтэй аймаг орон нутгийн удирдлага цаг үеийн байдлын талаар мэдээлэл хийхдээ, хэд хэдэн анхаарал татсан хойшлуулшгүй чухал асуудал байгааг Төрийн тэргүүнд дуулгалаа.
3 жил дараалан зуд болж, газрын гарц муу байсан, 11-р сараас хойш хэд хэдэн удаа дараалан их хэмжээний цас орж, байгалийн гамшиг болсон гээд өвөлжилт хүндхэн өнгөрсөн тухай ярилаа. Одоо ч байдал хүнд байна. Аймгийн онцгой комисс хугацаагүй бэлэн байдал зарлан ажиллаж байгаа юм байна. Засгийн газраас тусламж болгон өгсөн хөрөнгө мөнгөөр өвс тэжээл залгуулж байгаа ч, 5-р сар хүртэл байдал дээрдэхгүй гэж тооцвол тэжээлийн болон түүнийг тээвэрлэх тээврийн зардлын хөрөнгийн асуудал хүндээр тусч байгаа тухай Засаг дарга Г.Бямбажав хэллээ.
Аймгийн удирдлагууд, болон тэр аймгаас сонгогдсон УИХ-ын гишүүн Ж.Энхбаяр нар Алтай хотод үүсээд байгаа онцгой нөхцөл байдлын тухай танилцуулж, дэмжлэг хүслээ.
Алтай хот хэзээ мөдгүй хөлдөх аюултай нүүр тулаад байна. Хувьчлагдсанаасаа хойш дорвитой хөрөнгө оруулалт хийгдээгүй дулааны халаалтын зуух одоо аймгаа халааж дийлэхээ байжээ. Өнөөдөр тус хотод нэмж барилга барих бололцоогүй, байгаа хэдэн байшингаа халааж хүчрэхгүй, хэд хэдэн барилга байшин хөлдчихсөн байгаа энэ байдлыг яаралтай харж үзэн цаг алдалгүй шийдвэр гаргахад дэмжлэг үзүүлэхийг Монгол Улсын Ерөнхийлөгчөөс хүслээ. Хувьчлалыг буцааж, улсаас хөрөнгө оруулалт хийж хамтарсан аж ахуйн нэгж болгоод, мэргэжлийн удирдлагаар хангах хүсэлтийг орон нутгийн иргэд болон удирдлагууд тавьж байна. Ерөнхийлөгч энэ асуудалтай танилцаад, яаралтай шийдэх хэрэгтэй гэлээ. Хөрөнгө оруулалтыг тендерийн арга замаар шийдэх, эргэн төлөгдөх нөхцөлтэйгээр төрөөс санхүүжүүлэх гэхчилэн арга замууд байж болно. Буцаж очоод засгийн газрын холбогдох хүмүүстэй ярилцах болно гэлээ.
Тулгамдаад байгаа бас нэгэн асуудал бол, усны хангамжийн асуудал. 2010 он гэхэд одоо ашиглаж байгаа хоёр худгийн усны нөөц бүрэн дуусна гэсэн судалгааг мэргэжилтнүүд хийжээ. Шинээр худаг ашиглалтанд оруулахад шаардлагатай 1 тэрбум 500 сая төгрөг, одоо бэлэн байгаа худгийг станцтай холбоход шаардлагатай 186 сая төгрөгний хөрөнгийн эх үүсвэр яаралтай хэрэгтэй байгаа гэж гишүүн Ж.Энхбаяр ярилаа.
Төрийн зохицуулалт хэрэгтэй болсон бас нэгэн нөхцөл байдал Говь-Алтайд үүсчээ. Энэ нь гар аргаар алт олборлогчид болон лиценз эзэмшигчдийн хооронд үүсч байгаа үл ойлголцол, түүнээс үүдсэн эмх замбараагүй байдал юм. “Бигэрийн хавьд гар аргаар алт олборлогчид 10 гаруй мянгад хүрлээ. Албан хүчээр буцаагаад ч хүчрэхээ больсон” гэж нутгийн удирдлага учирлаж байна. Энэ асуудлыг төрийн оролцоотой зохицуулж болох олон арга зам байгаа талаар Ерөнхийлөгч хэллээ.
Говь-Алтайчууд алслагдсан баруун аймгуудад бүсийн нэмэгдэл олгож өгөхийг хүсч байна. “УИХ-ын зарим гишүүд баруун бүсийн нэмэгдлийн талаар хууль санаачилсан. Энэ хуулийг би бүрэн дэмжиж байгаа” гэж Ерөнхийлөгч хэллээ.
Өнгөрсөн жил Говь-Алтай аймгийн хэмжээнд жижиг дунд үйлдвэрлэлийг дэмжих бодлогын хүрээнд нийт 92 зээлдэгч, 850 сая төгрөгийн зээл авч, ахуй үйлчилгээ, талх нарийн боов, хүнсний ногооны хадгалалт зоорины аж ахуйн чиглэлээр ашиглажээ. Зээлийн үр дүнд 59 ААН сэргэж, 35 жижиг үйлдвэр ААН шинээр үйл ажиллагаагаа эхлүүлсэн байна. Бизнес төсөл нь амжилттай хэрэгжиж байгаа иргэд өөрсдийнхөө эрхэлж байгаа аж ахуйн талаар ярьж танилцуулж байлаа.
Ийнхүү Говь-Алтайчууд шийдүүлэх асуудал олонтойгоор өвлийг үдэж, хаврыг угтаж байна. Холбогдох албаны хүмүүстэй ярилцаж, цаг алдалгүй арга хэмжээ авахад анхаарах болно гэж Ерөнхийлөгч хэлэв.
Ерөнхийлөгч Ц.Элбэгдорж дараа нь Говь-Алтай аймгийн Дарив сумыг зорилоо.
