ХБНГУ-ын улс төрийн сангуудаас Монгол Улсад анх түрүүн үйл ажиллагаагаа явуулж эхэлсэн Конрад Аденауэрийн Сангийн /КАС/ суурин төлөөлөгчөөр 6 жилийн турш амжилттай ажиллаж ирсэн доктор, ноён Т.Шрапелийг нутаг буцах болсонтой нь холбогдуулан Монгол Улсын Ерөнхийлөгч Ц.Элбэгдорж хүлээн авч уулзан хоёр улсын харилцааг хөгжүүлэхэд оруулсан хувь нэмрийг нь үнэлэн “Алтан гадас” одонгоор шагналаа.
Шагнал гардуулсны дараа Монгол Улсын Ерөнхийлөгч хэлсэн үгэндээ, Монгол Улсад ардчиллыг бэхжүүлэх, ардчилсан төрийг боловсронгуй болгох, олон нийтийн улс төрийн боловсролыг дээшлүүлэхэд ХБНГУ-ын улс төрийн сангууд 1990 оноос хойш өнөөдрийг хүртэл ихээхэн чухал үүрэг гүйцэтгэж ирснийг онцлон тэмдэглээд цаашид ч энэхүү үйл ажиллагаагаа үргэлжлүүлэх болно гэдэгт итгэлтэй байгаагаа илэрхийлсэн юм.
Мөн тэрээр, КАС нь нутгийн өөрөө удирдах ёсны эрх мэдлийг нэмэгдүүлэх, мөн сонгуулийн тогтолцоог боловсронгуй болгох талаар ихээхэн хүчин чармайлт тавьж их зүйлийг хийж ирсэнд талархал илэрхийлж энэ чиглэлээр Монгол Улс тун удахгүй амжилтанд хүрэхэд ойрхон байгааг онцлов.
Ноён Т.Шрапел уулзалтын үеэр хэлсэн үгэндээ, “Монгол Улс бол ази тивдээ, бүс нутагтаа ардчиллын тогтолцоог амжилттай хэрэгжүүлж буй үлгэр жишээ орон юм. Танай улсын ардчилсан тогтолцоог улам боловсронгуй болгохын тулд манай сан цаашид ч тогтвортой, үр өгөөжтэй ажиллах болно” гэж хэлэв.
