Монгол Улсын Ерөнхийлөгчийн ивээл дор шинжлэх ухаан, бизнесийн байгууллага хоорондын түншлэл, хамтын ажиллагааг идэвхжүүлэх, эрдэм шинжилгээний бүтээл, дэвшилтэт технологийг хувийн хэвшлийнхэнд сурталчлан таниулах, судалгааны үр дүнг үйлдвэрлэл, хэрэглээнд нэвтрүүлэн хэрэгжүүлэх болон үр өгөөжийг нь дээшлүүлэх зорилгоор “Оюуны чадамж - хөгжлийн түлхүүр” үндэсний технологийн форумыг 2010 оны 3 дугаар сарын 29-31-ний өдрүүдэд зохион байгуулж байна.
Тус форумын ерөнхий зохион байгуулагчаар Шинжлэх ухааны академи, Монголын үндэсний худалдаа аж үйлдвэрийн танхим, Хүнс, хөдөө аж ахуй, хөнгөн үйлдвэрийн яам, Боловсрол, соёл, шинжлэх ухааны яам, хамтран зохион байгуулагчаар Нийслэлийн засаг даргын тамгын газар, Шинжлэх ухаан, технологийн их сургууль, Хөдөө аж ахуйн шинжлэх ухааны Академи, Монголын анагаах ухааны Академи, Шинжлэх ухаан, технологийн сан, Хөдөө аж ахуйн үйлдвэрлэлд шинжлэх ухааны ололт нэвтрүүлэх төв тус тус оролцож байна.
Форумын үеэр шинжлэх ухааны ололт амжилтыг харуулсан үзэсгэлэнг нэгэнт үйлдвэрлэлд нэвтэрсэн ажил, үйлдвэрлэгч, хувийн хэвшлийнхэнд санал болгох бүтээгдэхүүн, технологи, одоо хийж буй судалгаа, тэдгээрт шаардлагатай байгаа дэмжлэгийн талаархи мэдээлэл өгөх гурван чиглэлээр зохион байгуулж байгаа юм.
Үзэсгэлэнгийн нээлтэнд Монгол Улсын Ерөнхийлөгч Ц.Элбэгдорж оролцож хэлсэн үгэндээ, “Ямар технологийг сайн, шинэ технологи гэх вэ?” гэсэн асуултад “Байгальд ээлтэй технологийг л сайн, дэвшилтэт технологи гэнэ” гэж хариулж байна, “Ямар бизнесийг сайн бизнес гэх вэ?” гэхээр “Байгальд ээлтэй, хүний амьдралд тустай ийм бизнесийг л сайн бизнес гэж үзнэ” гэсэн хандлага дэлхий нийтэд бий болсон тухай өгүүлэв.
Мөн тэрээр эрдэмтдийн санаачилгыг үйлдвэрлэл, бизнесийн эргэлтэнд оруулж үр өгөөжтэй ажиллах, байгальд ээлтэй бизнесийг дэмжих, мөн салбар бүр шинэчлэлт хийж байж бид асуудлыг цогцоор нь шийдэх боломжтойг онцлон хэлэв.
