Өнөөдөр Монгол Улсын Ерөнхийлөгчийн Зөвлөхүүд Сүхбаатарын талбайд өлсгөлөн зарлаад байгаа АНАТХ-ны удирдагчидтай очиж уулзлаа.
Ерөнхийлөгчийн Хүний эрх, иргэний оролцооны бодлогын шинээр томилогдсон зөвлөх Ч.Сосормаа болон Олон нийтийн харилцаа, нийтлэг бодлогын зөвлөх А.Ганбаатар нар өлсгөлөн зарлаад байгаа хүмүүсийн эрүүл мэнд, биеийн байдал, хүний эрхийн орчин нөхцөл ямар байгаатай танилцаж үүссэн нөхцөл байдлыг зөвшилцлийн аргаар хэрхэн шийдэж болох талаар ярилцлаа.
Мөн Өнөөдөр Монгол Улсын Ерөнхийлөгч Ц.Элбэгдорж, УИХ-ын дарга Д.Дэмбэрэл, УИХ дахь МАХН-ын бүлгийн дарга Д.Лүндээжанцан, УИХ дахь АН-ын бүлгийн ахлагчийн орлогч Л.Гантөмөр, Төрийн байгуулалтын байнгын хорооны дарга Ө.Энхтүвшин нарыг хүлээж авч уулзан, Сүхбаатарын талбайд өлсгөлөн зарлаж, улстөрийн суулт хийж байгаа иргэдийн төлөөлөлтэй УИХ-аас уулзах нь зүйтэй гэсэн байр суурьтай байгаагаа илэрхийлснийг өлсгөлөн зарлагчдад хэлсэн юм.
Улс төрийн суулт хийгээд байгаа АНАТХ-ныхон тэдний хүний эрхийн талаарх нөхцөл байдлыг анхааран Монгол Улсын Ерөнхийлөгч төлөөлөгчдөө явуулсанд талархал илэрхийлээд Монгол Улсын Ерөнхийлөгч Үндэсний эв нэгдлийн илэрхийлэгчийнхээ хувьд тулгамдаад байгаа асуудлуудыг шийдвэрлэхэд чухал үүрэгтэй оролцоно гэдэгт найдаж буйгаа хэллээ.
