Өнөөдөр Монгол Улсын Ерөнхийлөгч Цахиагийн Элбэгдорж “Амжилтын төлөө хамтдаа” ТББ-ын төлөөлөгчдийг хүлээн авч уулзлаа.
Тус байгууллагын үүсгэн байгуулагчид нь Олимпийн аварга, Монгол Улсын хөдөлмөрийн баатар Э.Бадар-Ууган, Хөдөлмөрийн баатар Х.Цагаанбаатар, Гавъяат тамирчин Б.Наранбаатар нар бөгөөд одоогоос 3 сарын өмнө Ерөнхийлөгчид үйл ажиллагаа танилцуулж байсан юм.
Амжилтын төлөө хамтдаа ТББ-ынхан энэ оны 3 дугаар сард гарсан “Нийтийн биеийн тамир, спортыг хөгжүүлэх тухай” Монгол Улсын Ерөнхийлөгчийн зарлигийг дэмжиж 21 аймагт Монгол хүний эрүүл бие, саруул ухааны талаар лекц уншихаар болсон тухайгаа Ерөнхийлөгчид ярилаа. Тэд өнгөрөгч долоо хоногт Дархан Уул аймаг, Хөтөл хотуудад “Эх оронч сэтгэлгээ ба Монгол зан уламжлал”, “Өрсөлдөх чадвартай эрүүл Монгол”, “Зорилго ба ирээдүй” зэрэг сэдвүүдээр залуучууд, олон нийтэд зориулж лекц уншсан юм.
2012 оны Лондонгийн Олимп ойртож буй энэ үед спортын өндөр амжилт гаргахаар бэлтгэх зуураа залуучууддаа, иргэддээ зориулсан зөв зүйтэй мэдээлэл хүргэсэн сайн санаачилга хэрэгжүүлж буйд нь Монгол Улсын Ерөнхийлөгч талархал илэрхийлээд Э.Бадар-Ууган, Х.Цагаанбаатар, Б.Наранбаатар нарыг Монгол Улсын Ерөнхийлөгчийн орон тооны бус спортын зөвлөхүүд болгосон юм.
Монгол Улс, их спортын төрөлд дэлхийн хэмжээний амжилтаа улам бүр бататгахад идэвхитэй хамтран ажиллахаа тамирчид илэрхийлэв.
