Өнөөдөр Монгол Улсын Ерөнхийлөгчийн Тамгын газарт зургаан талт санамж бичигт гарын үсэг зурах ёслол боллоо.
Уг санамж бичгийн зорилго нь Монгол Улсын эдийн засаг, нийгмийн тодорхой асуудлуудаар талуудын байр суурийг нэгтгэн дүгнэх, шаардлагатай гэж үзвэл аливаа асуудлаар шинжилгээ судалгаа хийх, онол практикын хурал зохион байгуулах, мэргэжлийн зөвлөмж, санал дүгнэлт гаргах, холбогдох байгууллагууд, иргэдэд сурталчлан таниулах зэргээр үр дүнтэй хамтран ажиллах явдал юм.
Энэхүү санамж бичгийг Монгол Улсын Ерөнхийлөгчийн дэргэдэх Төсөв, мөнгө, татварын бодлогын салбар зөвлөл, Удирдлагын академи, Үндэсний хөгжлийн хүрээлэн, Монгол Улсын Их сургуулийн Эдийн засгийн сургууль, Санхүү эдийн засгийн дээд сургууль болон “Монгол” дээд сургуулиуд харилцан тохиролцож хамтран ажиллахаар байгуулсан.
Хамтран ажиллах тухай санамж бичиг үзэглэх ёслолд оролцсон хүмүүсийн сэтгэгдлийг сонсоход:
Удирдлагын академийн захирал Г.Чулуунбаатар:
Өнөөдөр Монгол Улсын Ерөнхийлөгчийн дэргэдэх төсөв, мөнгө, татварын бодлогын зөвлөл, Удирдлагын академи, Монгол Улсын эдийн засгийн сургууль, Монгол дээд сургууль, СЭЗДС гэсэн 6 субьект хамтран ажиллах санамж бичигт гарын үсэг зурж байна.
Төсөв, татвар, мөнгө, санхүүгийн бодлогын салбарт Монгол төрийн бодлогын үндсийг шинжлэх ухааны үндэстэй тодорхойлох, бодлогын хэрэгжилтийг мөн судалгаа, шинжилгээ, эрдэмтэн мэргэжилтнүүдийн оюун ухааны боловсруулж гаргасан үр дүн дээр тулгуурлаж үр ашигтай зохион байгуулах ийм эхлэлийг тавьж байгаа.
Төрийн бодлогын уураг тархины нэг лабораторийн механизм ажиллаж эхэллээ гэж бодож байна. Цаашдаа төсөв, мөнгөтэй холбоотой, эдийн засаг хөгжлийн бодлого, стратегитэй холбоотой олон асуудлууд зөвхөн албан тушаалтнууд юм уу, төрийн байгууллагуудын тасалгаанаас биш эрдэмтдийн санаа бодол уралдсан олон түмний хүсэл, хүлээлт, хэрэгцээ шаардлагыг мэдэрсэн судалгаа, дүгнэлтүүд дээр тулгуурлаж явах эхлэл тавигдаж байна гэж бодож байна.
Монгол дээд сургуулийн захирал Н.Дашзэвэг:
Хөгжингүй орны Ерөнхийлөгч, УИХ, Засгийн газар бол Их, дээд сургуулиудын тэргүүлэх профессоруудтай орон тооны зөвлөх, зөвлөлийн гишүүн гэх мэтээр байнга хамтран ажилладаг. Монгол Улсад анх удаагаа Ерөнхийлөгчийн дэргэд бодлогын зөвлөл, think-tank гэж ярьдаг, сэтгэх хүч ч гэдэг ийм том зохион байгуулалттай бүтэц бий болж байгаа нь маш зүйтэй байгаа юм.
Энэ маань цаашид УИХ, ЗГ, бодлогын яамдын удирдлагын түвшинд хэрэгжих байх гэж бодож байгаа. Гол нь төрөөс гаргаж байгаа шийдвэр дээр улс төрийн нөлөөгүй, хувийн компанийн нөлөөгүй, хараат бус, шинжлэх ухааны үндэстэй шийдвэр гаргахад монголын их, дээд сургуулиуд, эрдэм шинжилгээний байгууллагуудын төлөөлөлтэй хамтарч байгаа нь энэ ажлыг шинэ шатанд гаргаж байгаа, зөв шийдвэр гаргахад маш их тус дэмжлэг болно гэж бодож байна.
Монгол Улсын Их Сургуулийн Эдийн засгийн сургуулийн захирал Ц.Даваадорж:
Энэ арга хэмжээ бол монголын эрдэмтэн, судлаачдын үгийг бодлого боловсруулагчдад хүргэх арга замыг нээж өгч байна гэсэн үг юм. Урд нь бол эрдэмтэн, судлаачдын үг, дуу хоолой сонин, сэтгүүлээр дээр гардаг гэхдээ бодлого хэрэгжүүлэгчид, шийдвэр гаргагч нарт очиж хүрээд бодлогодоо тусч байна уу гэвэл бас учир дутагдалтай байсан.
Үүнийг зохион байгуулалтад оруулж бодлого боловсруулагчдад эрдэмтдийн дуу хоолойг хүргэх механизм бүрдэж байна гэдэг талаас нь бид дэмжиж оролцож байна.
СЭЗДС-ийн Судалгаа шинжилгээ, доктрантурын асуудал эрхэлсэн орлогч захирал С.Түвшинзаяа:
СЭЗДС-ийн хувьд бусад эрдэм шинжилгээ, судалгаа эрхэлдэг байгууллагуудтайгаа болон Ерөнхийлөгчийн дэргэдэх төсөв, мөнгө, татварын зөвлөлтэй хамтарч судалгаа шинжилгээний ажил хамтарч хийхээр санамж бичигт гарын үсэг зурлаа.
Энэ нь эрдэмтэн багш нарын мэдлэг чадвар, тэдний явуулж байгаа судалгааны үр дүнг төр засгийн бодлого шийдвэр гаргахад тусгах боломж бүрдэж байна. Энэ утгаараа байгууллагуудын хамтын ажиллагааг дэмжсэн ач холбогдолтой үйл ажиллагааг эхлүүлж байна.
