Монголын төр, шашны нэрт зүтгэлтэн, их эрдэмтэн, гүүш Равжамба Зая бандида Намхайжамцын түмэн өлзий гийсний 410 жилийн ойд зориулсан эрдэм шинжилгээний хуралд оролцож байгаа Та бүхэнд амжилт бүтээл, сайн сайхан бүхнийг хүсч мэндчилье.
Арван долоодугаар зууны Монголын улс төрийн ээдрээтэй үед монголчуудыг эе эвээр, шашны нэгэн тугийн дор нэгдүүлж тусгаар байдлаа хамгаалах, шашин соёл, бичиг эрдмийг мандуулах үйлсэд амьдралаа зориулсан Зая бандида Намхайжамцын байгуулсан гавъяа, зүтгэлийг Төрийн тэргүүн миний бие ойн энэ өдөр бахархан тэмдэглэж байна.
Зая бандида Намхайжамцын зохиосон тод үсэг, төвд хэлнээс орчуулсан олон зуун судар ном, төвд санскрит үгийг бичиж тэмдэглэхэд учирдаг бэрхшээлийг арилгасан галиг үсэг, яруу сонсголонт шүлэг сэлт зэрэг Монгол соёл, шинжлэх ухаанд гайхамшигтай ул мөрөө үлдээсэн бүхнийг нь хойч үеийнхэн бид судалж, сурталчлах, олон нийтэд таниулж мэдүүлэх, хөшөө дурсгалыг нь цогцлоон бүтээж, судар номыг нь олны хүртээл болгох үүрэпгэй.
Оюун санаа, итгэл бишрэлийн чөлөө учрал бүрдсэн энэ он жилүүдэд хөгжил дэвшлийн шинэ гараан дээр ирээд байгаа монголчууд бид өвөг дээдсийнхээ баатарлаг түүхэн гавъяа зүтгэлээс суралцаж, Зая бандида Намхайжамцын эв нэгдлээ бэхжүүлж, цог хийморио дэгжээн бадрааж үндэсний ухамсар, сэтгэлгээг хөгжүүлэх гэсэн эгэлгүй хүчин чармайлтыг үеийн үед санаж явбаас зохилтой гэдгийг ойн энэ өдөр онцгойлон захиж хэлье.
Монгол түмний минь билэг оюуны наран өнөд мандан гийж, сайн үйлс бүхэн дэлгэрч байх болтугай.
Монгол Улсын Ерөнхийлөгч
Цахиагийн Элбэгдорж
